19.11.2024 | 22:38
Ադրբեջանի ԳՇ պետը Պակիստանում նոր զինատեսակների է ծանոթացել
Բռնության դեպքեր, վիրավորանք. լրագրողական համայնքը՝ թիրախում․ ՏԵՍԱՆՅՈՒԹ
Քաղաքականություն
25.01.2022 | 20:40
Լրագրողների նկատմամբ բռնության դեպքերն աճում են։ Նախորդ տարի, 2020 թվականի համեմատ, նման դեպքերը երեք անգամ ավելացել են։ Եթե 2020-ին արձանագրվել է լրագրողների և օպերատորների նկատմամբ ֆիզիկական բռնության 6 դեպք, ապա նախորդ տարի դեպքերը հասել են 18-ի: Տվյալները բարձրաձայնում է Խոսքի ազատության պաշտպանության կոմիտեի նախագահ Աշոտ Մելիքյանը՝ ներկայացնելով 2021 թվականի զեկույցը։ Դեպքերը հիմնականում տեղի են ունեցել բողոքի ակցիաների ժամանակ։
«Ոչ միայն քաղաքական ուժերի ներկայացուցիչները, այլև նրանց համախոհները, որպես կանոն, նույնացնում էին լրագրողին և լրատվամիջոցին այն քաղաքական ուժի հետ, որի հովանու ներքո այն գործում է։ Այդ դրդապատճառով նաև հարձակումներ էին լինում, ինչն անթույլատրելի է։ Անհանդուրժողական մթնոլորտը դրսևորվում էր լրագրողների նկատմամբ»,- ասում է Մելիքյանը։
Վերջին օրերին լրագրողական համայնքում մեծ աղմուկ առաջացրեց հունվարի 20-ին ԱԺ ամբիոնից իշխանական պատգամավոր Վահագն Ալեքսանյանի հնչեցրած արտահայտությունը։ Մի շարք լրագրողական կազմակերպություններ, այդ թվում՝ Խոսքի ազատության պաշտպանության կոմիտեն, հայտարարությամբ դատապարտեցին Ալեքսանյանի ելույթը՝ պահանջելով նրանից ներողություն խնդրել լրագրողներից, իսկ իշխող «Քաղաքացիական պայմանագիր» կուսակցությունից՝ դատապարտել պատգամավորի ելույթը, հակառակ դեպքում, կստացվի, որ թիմը համամիտ է տվյալ պատգամավորի խոսքերի հետ։
ՔՊ-ական պատգամավորի հայտարարությանը, լրատվամիջոցների հարցին ի պատասխան, երեկ անդրադարձավ վարչապետ Նիկոլ Փաշինյանը՝ առցանց ասուլիսում։
«Վահագն Ալեքսանյանի արտահայտությունը պետք չէ կոնտեքստից կտրել․ նա բոլորովին ուրիշ բան է ասել։ Նա անդրադարձել է բռնության, ապօրինության քարոզին, և եթե ես լինեի գործող լրագրող, այդ հայտարարություններն ինձ չէի վերագրի, եթե ես լրագրող եմ և իմ մասնագիտությանը ծառայում եմ ազնիվ»,- ասաց Փաշինյանը։
ԽԱՊԿ նախագահը նկատում է՝ վարչապետը, փաստորեն, սատարեց թիմակցին։
Մանրամասները՝ տեսանյութում։
Մերի Մարտիրոսյան
