Ադրբեջանում տեղի է ունեցել երկու հայ ռազմագերիների շինծու գործով դատավարության հերթական նիստը

Ադրբեջանում այսօր շարունակվել է երկու հայ ռազմագերիներ Իշխան Աշոտի Սարգսյանի և Վլադիմիր Օթարի Ռաֆայելյանի շինծու քրգործով դատավարությունը, հաղորդում են ադրբեջանական լրատվամիջոցները։
Դատավարությունը տեղի է ունեցել Բաքվի Սաբունչիի շրջանային դատարանի շենքում՝ Գանձակի ծանր հանցագործությունների գործերով դատարանի դատավոր Էլմին Ռուստամովի նախագահությամբ։ Նիստի ընթացքում ուսումնասիրվել են գործին առնչվող փաստաթղթեր։

Նշվում է, որ, իբր, Իշխան Սարգսյանի հեռախոսի զննությամբ հայտնաբերվել է տեսանյութ, որը նկարահանված է 2019 թվականին, և ըստ որի, իբր, որոշվել են Թովուզի շրջանի Աղբուլաղ գյուղի կոորդինատները։ Այս գյուղից 40 կմ հեռավորության վրա գտնվում է Բաքու-Թբիլիսի-Ջեհյան նավթամուղի կայանը։

Այս շինծու մեղադրանքից զատ՝ նշվում է, որ Իշխան Սարգսյանի հեռախոսում հայտնաբերվել են նաև լուսանկարներ Քարավաճառից՝ ականապատումից առաջ։ Այնուհետև հայտարարվել է, որ դատավարությունն ավարտվել է։ Դատախազը դատարանից ժամանակ է խնդրել ելույթի համար։ Հաջորդ դատական նիստը նշանակվել է փետրվարի 28-ին։

Նշենք, որ Բաքուն հայ գերիներին մեղադրում է ահաբեկչության մեջ։

Նախորդ դատական նիստը տեղի էր ունեցել հունվարի 10-ին։ Նիստի ընթացքում ռազմագերի Իշխան Սարգսյանը, ըստ ադրբեջանական լրատվամիջոցների, հայտարարել է, թե եղել են հատուկ նշանակության ջոկատի զինվորներ և հրաման են ստացել տարածքը հետախուզել, ականապատել ու փշալարերով պատել։ Բացի այդ, նա, իբր, նշել է, որ «հրամայվել է Տավուշյան մարտերի ժամանակ պայթեցնել Բաքու-Թբիլիսի-Ջեյհան նավթամուղը»։
Էմմա Չոբանյան