Արմեն Սարգսյանին ՀՀ նախագահի պաշտոնում ժամանակավորապես կփոխարինի ԱԺ նախագահ Ալեն Սիմոնյանը

«Հանրապետության նախագահի պաշտոնանկության, լիազորությունների կատարման անհնարինության, հրաժարականի կամ մահվան դեպքերում մինչև նորընտիր Հանրապետության նախագահի կողմից պաշտոնի ստանձնումը Հանրապետության նախագահի լիազորությունները կատարում է Ազգային ժողովի նախագահը»,- նշված է ՀՀ Սահմանադրության հոդված 144-ում:

Հիշեցնենք՝ քիչ առաջ նախագահի պաշտոնական կայքում հրապարակվեց Արմեն Սարգսյանի հրաժարականի դիմումը:
Նախագահ Արմեն Սարգսյանը հրաժարականի տեքստում խոսել է համազգային ճգնաժամի մասին և շեշտել. «Նախագահը չունի անհրաժեշտ գործիքներ՝ երկրի և ազգի համար ներկայիս բարդ ժամանակներում ազդելու ներքին և արտաքին քաղաքականության արմատական գործընթացների վրա»:

Նշենք, որ Արմեն Սարգսյանի հրաժարականը նախագահի պաշտոնից դեռևս ընդունված չէ, քանի դեռ այն չի ներկայացվել Ազգային ժողովում:
«Հանրապետության նախագահն իր հրաժարականը ներկայացնում է Ազգային ժողով: Հրաժարականը համարվում է ընդունված օրենքով սահմանված կարգով այն հրապարակելու պահից»,- նշված է է ՀՀ սահմանադրության հոդված 142 -ում:

Նշենք, որ ՀՀ նախագահն ընտրվում է յոթ տարի ժամկետով, Արմեն Սարգսյանը պաշտոնավարեց չորս տարի՝ անակնկալ հրաժարական ներկայացնելով: Արմեն Սարգսյանն ընտրվել էր 2018 թվականին՝ Սերժ Սարգսյանի իշխանության օրոք:
Անդրադառնալով ՀՀ նախագահի նոր ընտրությանը նշենք, որ հրաժարականի դեպքում Հանրապետության նախագահի պաշտոնը թափուր մնալուց ոչ շուտ, քան 25, և ոչ ուշ, քան 35 օր հետո անցկացվում է Հանրապետության նախագահի արտահերթ ընտրություն: Հանրապետության նախագահի թեկնածու առաջադրելու իրավունք ունի պատգամավորների ընդհանուր թվի առնվազն մեկ քառորդը՝ 37 պատգամավոր։ Հանրապետության նախագահ է ընտրվում այն թեկնածուն, որը ստացել է պատգամավորների ընդհանուր թվի ձայների առնվազն երեք քառորդը՝ 80 պատգամավոր:

Ըստ Սահմանադրության պահանջների՝ ԱԺ-ում ՀՀ նախագահի արտահերթ ընտրությունները տեղի կունենան փետրվարի վերջին տասնօրյակում:

Նարեկ Կիրակոսյան