Թուրքիայի ՊՆ-ում խոսել են F-16-ի շուրջ ԱՄՆ-ի հետ բանակցությունների մասին

Թուրքիայի և ԱՄՆ-ի բանակցությունները Վաշինգտոնում F-16 կործանիչների մատակարարման շուրջ դրական են անցել, «ՌԻԱ Նովոստի»-ի փոխանցմամբ՝ հայտարարել է Թուրքիայի պաշտպանության նախարար Հուլուսի Աքարը:

Ավելի վաղ CNN-Turk հեռուստաալիքը, հղում անելով իր ամերիկյան աղբյուրներին, հայտնել էր, որ ԱՄՆ-ը կարող է հավանություն տալ Սև ծովում ՆԱՏՕ-ի դաշնակիցներին ուժեղացնելու նպատակով F-16 կործանիչների գնմանը Թուրքիայի կողմից:

«Նոր F-16-ի մատակարարման և արդիականացման պաշտոնական հարցումներ են արվել: Դրանից հետո ԱՄՆ է մեկնել պատվիրակությունը, բանակցությունները դրական էին։ Մենք հստակ շարադրել ենք մեր դիրքորոշումը։ Բացատրել ենք, որ դա նույնպես կնպաստի ՆԱՏՕ-ի ուժեղացմանը։ Եթե Թուրքիան ուժեղ է, նա ուժեղ է ՆԱՏՕ-ում։ Թուրքիայի ուժը ՆԱՏՕ-ի ուժն է»,- Աքարի խոսքը մեջբերում է թուրքական Milliyet-ը։

ԱՄՆ-ն ավելի վաղ Թուրքիային պաշտոնական ծանուցում էր ուղարկել Անկարայի կողմից ռուսական C-400 ՀՕՊ համակարգերի գնման պատճառով վերջինիս F-35 նորագույն կործանիչների մատակարարումների ծրագրից հանելու մասին: ԱՄՆ-ը չեղարկել է F-35-ի վերաբերյալ համատեղ հուշագիրը, որը Թուրքիայի կողմից ստորագրվել է 2007 թվականի հունվարին՝ այն ստորագրելով F-35 նախագծի մնացած յոթ գործընկերների՝ Մեծ Բրիտանիայի, Իտալիայի, Նիդեռլանդների, Ավստրալիայի, Դանիայի, Կանադայի և Նորվեգիայի հետ: Թուրքիայի նախագահը հայտարարել է, որ ԱՄՆ-ն իր երկրին առաջարկել է F-16 կործանիչներ գնել F-35-ի մատակարարումների ծրագրից հանվելուց հետո: