ԵՐԵՎԱՆԻ ԺԱՄԱՆԱԿՈՎ. Մեր ներսում պատերազմը շարունակվում է, ժողովրդի հոգեվիճակը չի կայունացել. Արտավազդ Բայաթյան. ՏԵՍԱՆՅՈՒԹ

«Պատերազմից հետո մեր ժողովրդի հոգեվիճակը վերականգնելու, կայունացնելու ուղղությամբ ոչինչ չի արվում, փոխարենը նրան սնում են բացասական իմպուլսներով: Մինչև հանրությունը չխաղաղվի, չի կարող պարզորոշ դատողություններ անել իր հետ կատարվածի վերաբերյալ: Մեր ներսում պատերազմը շարունակվում է, մինչդեռ հարկավոր էր բալանսի մեջ մնալ»,- Factor TV-ի հետ զրույցում նման տեսակետ է հայտնում երգիչ, երգահան Արտավազդ Բայաթյանը:

Նա անդրադառնում է նաև այսօրվա իշխանության և ընդդիմության ներկայացուցիչների վարքագծին խորհրդարանում և կառավարությունում.

«Պատգամավորները ցույց են տալիս մարդկային ամենաստորին որակներ, մեկը մյուսի խոսքի տակ չի ուզում մնալ: Ունենք անհետաքրքիր, անհեռանկարային պառլամենտ: Պատգամավորներ կան` նայում ես ու մտածում` էս ո՞վ ա, որտեղի՞ց ծլեց: «Գրպանային» մարդիկ կան, որոնք կարող են ամեն վայրկյան դուրս գալ ու դառնալ պատգամավոր»,- ասում է երգահանը:

Նա խոսում է նաև արտաքին քաղաքական հարցերի շուրջ, մասնավորապես` իշխանության կողմից հնչեցվող այն հայտարարության, ըստ որի`1 Հայաստանը պատրաստ է առանց նախապայմանների հասնել հայ-թուրքական հարաբերությունների կարգավորմանը.

«Ցանկացած երկիր պետք է լուծի իր հարցերը հարևանների հետ, խռով մնալը, չձգտելը ստեղծել հարաբերություններ` սխալ է, նույնիսկ եթե կան պատմական խնդիրներ, որոնք հարկավոր է լուծել: Կոնտակտը խրախուսելի է, այլապես թշնամությունը կարող է անբուժելի դառնալ, բայց կան հարցեր, որոնց շուրջ բանակցել ընդհանրապես պետք չէ, օրինակ` Հայոց ցեղասպանության հարցը: Իսկ ընդհանուր առմամբ ես շատ լավատես ու ոգևորված չեմ հայ-թուրքական հարաբերությունների կարգավորմամբ, քանի որ այդ հարաբերություններում միջնորդ կա` Ռուսաստանը, որն ուզում է կարգավորման` իրեն ձեռնտու տարբերակին հասնել»:

Մանրամասները` տեսանյութում:

Աննա Բաբաջանյան