27.08.2026 | 23:19
Ծանրամարտի Հայաստանի պատանեկան հավաքականը երկրորդ տարին անընդմեջ լավագույնն է Եվրոպայի առաջնությունում
ՀՀ դատախազությունում կուսումնասիրվեն Ն. Փաշինյանի վերաբերյալ 2010 թ. կայացված դատական ակտերը
Հասարակություն
21.01.2022 | 12:19
Օրեր առաջ Մարդու իրավունքների Եվրոպական դատարանը հրապարակել էր «Փաշինյանն ընդդեմ Հայաստանի» գործով վճիռը` 2008թ –ի նախագահական ընտրություններին հաջորդած իրադարձությունների վերաբերյալ։ Դատարանն արձանագրել էր, որ խախտվել են Փաշինյանի` Մարդու իրավունքների եվրոպական կոնվենցիայով ամրագրված խաղաղ հավաքների ազատության, խոսքի ազատության, ազատության և անձնական անձեռնմխելիության իրավունքները։ Փաշինյանն իր հայցադիմումում դրամական փոխհատուցման պահանջ չէր ներկայացրել ՀՀ-ին:
Factor.am-ն այս առիթով մեկնաբանություն խնդրեց Գլխավոր դատախազի խորհրդական Գոռ Աբրահամյանից։ «Առաջիկայում ՄԻԵԴ որոշման լույսի ներքո ՀՀ դատախազությունում կուսումնասիրվեն Ն. Փաշինյանի վերաբերյալ 2010 թ. կայացված դատական ակտերը և կնախաձեռնվի նրա խախտված իրավունքների վերականգնման նպատակով դրանք բեկանելու և փոփոխելու դատական բողոքարկման գործընթաց»,-ասաց Աբրահամյանը։
Հիշեցնենք՝ 2020 թվականի մայիս ամսին բավարարելով ՀՀ գլխավոր դատախազի բողոքները՝ Վճռաբեկ դատարանն արդարացրել էր Մարտի 1-ի գործով դատապարտված Արմեն Ավագյանին, Մասիս Այվազյանին, Կարեն Թարխանյանին, Դավիթ Աղայանին, Վարդգես Գասպարիին, Վարդան Ջհանգիրյանին, Արման Շահինյանին, Դավիթ Մաթևոսյանին, Խաչիկ Գասպարյանին և Սամվել Հարությունյանին։ Եվս մեկ դատապարտյալի՝ Արամ Բարեղամյանի վերաբերյալ գործով Վճռաբեկ դատարանը մասնակի էր բավարարել բողոքը՝ որոշելով բեկանել դատավճիռը և քրեական գործն ուղարկել Ընդհանուր իրավասության դատարան՝ նոր քննության:
Օրինական ուժի մեջ մտած այդ դատավճիռների դեմ դատախազությունը բողոք էր ներկայացրել նոր հանգամանքի և արդարադատության բուն էությունը խաթարող հիմնարար իրավունքների խախտման հիմքով։
Ռոզա Վարդանյան
