17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
Զախարովան մեկնաբանել է Պեկրեսի՝ ԼՂ կատարած այցից հետո Ադրբեջանի հայտարարությունները՝ հիշեցնելով ԼՂ այցելելու կարգի մասին
Քաղաքականություն
20.01.2022 | 14:24
ՌԴ ԱԳՆ պաշտոնական ներկայացուցիչ Մարիա Զախարովան իր ամենշաբաթյա ճեպազրույցի ժամանակ պատասխանելով Ֆրանսիայի նախագահի թեկնածու Վալերի Պեկրեսի՝ Արցախ այցից հետո ադրբեջանական կողմի հայտարարությունների վերաբերյալ լրագրողի հարցին՝ հիշեցրել է եռակողմ հայտարարության և ԼՂ այցերի վերաբերյալ ռուս խաղաղապահների կողմից սահմանված կարգի մասին։
«Ռուսական խաղաղապահ զորախումբը տեղակայված է շփման գծի և Լաչինի միջանցքի երկայնքով՝ հիմնվելով Ադրբեջանի, Հայաստանի և Ռուսաստանի ղեկավարների՝ 2020 թվականի նոյեմբերի 9-ին ղարաբաղյան հակամարտության գոտում լիակատար հրադադարի և բոլոր ռազմական գործողությունների ավարտի մասին հայտարարության վրա»,- ասել է Զախարովան։
Նրա խոսքով՝ այս հայտարարության 6-րդ կետի համաձայն՝ Լաչինի միջանցքը գտնվում է ռուս խաղաղապահների հսկողության տակ և Ադրբեջանը երաշխավորում է երկու ուղղություններով քաղաքացիների, մեքենաների, բեռների տեղաշարժի անվտանգությունը։
Զախարովան նաև նշել է, որ ռուսական խաղաղապահ կոնտինգենտի հրամանատարությունը սահմանել է Լեռնային Ղարաբաղ այցերի կարգը, այդ թվում՝ օտարերկրյա քաղաքացիների, միջազգային կազմակերպությունների աշխատակիցների, առաքելությունների համար։
«Այդ ընթացակարգը լավ հայտնի է ինչպես ադրբեջանական, այնպես էլ հայկական կողմերին: Մասնավորապես, նախատեսվում է ռուս խաղաղապահների նախնական և պատշաճ ծանուցում նման ուղևորությունների մասին: Սա մեր հիմնական մոտեցումն է»,- ասել է Զախարովան:
Տաթև Ֆռանգյան
