Դավիթ Տոնոյանի և մյուսների գործով  առաջին դատական նիստը մեկնարկեց դռնփակ 

Երևան քաղաքի ընդհանուր իրավասության դատարանում, դատավոր Մանվել Շահվերդյանի նախագահությամբ, քիչ առաջ մեկնարկեց «Անպիտան հրթիռներ» անունը ստացած քրեական գործի քննությունը։ Նիստն ի սկզբանե դռնբաց պետք է լիներ, սակայն բոլորի համար անակնկալ՝ դատարանը հենց սկզբից լրատվամիջոցներին արգելեց մտնել նիստերի դահլիճ՝ առանց որևէ պատճառաբանություն ներկայացնելու։ Սովորաբար նախնական դատական նիստերը դռնբաց են անցկացվում, քանի որ  դրանց ընթացքում հիմնականում խափանման միջոցի փոփոխման մասով միջնորդություններ են ներկայացվում։ Թե որն է դատարանի նմանօրինակ որոշման պատճառը, այս պահին հայտնի չէ։ Դատական նիստը դեռ շարունակվում է։

Նշենք, որ Դավիթ Տոնոյանի պաշտպանական խումբն օրեր առաջ էր հայտարարություն տարածել, որ ՊՆ նախկին ղեկավարը պահանջելու է դռնբաց դատական նիստեր՝ քրեական գործի հրապարակային քննություն ապահովելու համար:

Ամբաստանյալի աթոռին են հայտնվել պաշտպանության նախկին նախարար Դավիթ Տոնոյանը, ԶՈՒ ԳՇ նախկին պետի տեղակալ Ստեփան Գալստյանը, ԳՇ պետ Արտակ Դավթյանը, Պատրոն Դավո մականվամբ հայտնի զենք մատակարարող ընկերության տնօրեն, գործարար Դավիթ Գալստյանն ու ևս 4 բարձրաստիճան պաշտոնյաներ։

Ըստ Ազգային անվտանգության ծառայության՝ 2018-ից 2020 թվականներին պաշտպանության նախարարի պաշտոնը զբաղեցրած Դավիթ Տոնոյանը որպես մեղադրյալ է ներգրավվել շուրջ 4.7 մլն դոլար հափշտակելու և կեղծիքներ, հանրորեն վտանգավոր արարքներ կատարելու համար։ Նույն գործով մեղադրյալ են նաև բանակին զինամթերք մատակարարած ընկերության տնօրենը՝ Պատրոն Դավո մականունով հայտնի Դավիթ Գալստյանը և մյուս նախկին բարձրաստիճան պաշտոնյաները։ Իսկ Արտակ Դավթյանը մեղադրվում է պաշտոնեական դիրքը չարաշահելու կամ պաշտոնեական լիազորությունների սահմանն անցնելու համար, որը ծանր նյութական հետևանքներ է առաջացրել։

Ռոզա Վարդանյան