09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Ալիևը սպառնացել է խոչընդոտել ԵԱՀԿ Մինսկի խմբի գործունեությունը
Քաղաքականություն
12.01.2022 | 22:56
Ադրբեջանի նախագահ Իլհամ Ալիևը հայտարարել է, որ ադրբեջանական կողմը խոչընդոտելու է Լեռնային Ղարաբաղի հակամարտության կարգավորմամբ զբաղվող միակ միջազգայնորեն ճանաչված ձևաչափի՝ ԵԱՀԿ Մինսկի խմբի գործունեությունը: «Արմենպրես»-ի փոխանցմամբ՝ այս մասին հայտնում է 1news.az-ը:
Ադրբեջանական հեռուստաընկերություններին տված հարցազրույցում Ալիևը հեգնանքով է խոսել Մինսկի խմբի համանախագահների գործունեության մասին՝ ասելով. «Ես տեղյակ չեմ, թե ինչով է զբաղվում ԵԱՀԿ Մինսկի խումբը: Կարծում եմ՝ նրանք հիմա պատրաստվում են հոբելյանական միջոցառումներին: Ինչպես հայտնի է, Մինսկի խումբը ստեղծվել է 1992 թվականին, և այս տարի լրանում է դրա 30-ամյակը»:
Ի հեճուկս մինչ այժմ ԵԱՀԿ Մինսկի խմբի համանախագահ երկրների արած հայտարարությունների՝ Ալիևը հայտարարել է, թե համանախագահները «այլևս չպետք է զբաղվեն Լեռնային Ղարաբաղի հակամարտությամբ, քանի որ հարցն արդեն լուծված է»:
Ալիևը հայտարարել է, որ Ադրբեջանը կասեցնելու է Մինսկի խմբի՝ ԼՂ խնդրով զբաղվելու ցանկացած փորձ:
Անդրադառնալով ԵԱՀԿ Մինսկի խմբի համանախագահների գործունեությանը՝ ավտորիտար Ադրբեջանի ղեկավարը ծաղրել է՝ ասելով. «Ըստ էության, [համանախագահները] արդեն 30 տարվա աշխատանքային ստաժ ունեն, նրանք թոշակի անցնելու շեմին են: Այդ իսկ պատճառով նրանց երկար տարիների կյանք ու քաջառողջություն եմ մաղթում»:
