10.10.2026 | 12:57
Նավթի գներն աճել են
Թուրքիայում 33 անձ է ձերբակալվել՝ FETO-ի հետ կապեր ունենալու մեղադրանքով
Քաղաքականություն
11.01.2022 | 13:45
Թուրքիայի իշխանությունները 33 անձի ձերբակալության օրդեր են տվել․ նրանք կասկածվում են Ֆեթուլլահական ահաբեկչական կազմակերպության (FETO) հետ կապ ունենալու մեջ։ Այս կազմակերպությանը պաշտոնական Անկարան մեղադրում է 2016 թվականի հուլիսին պետական հեղաշրջման փորձ իրականացնելու մեջ։
Milliyet թերթը, հղում անելով Անկարայի գլխավոր դատախազությունը, գրում է, որ Ազգային հետախուզական ծառայության (MIT), Անվտանգության գլխավոր վարչության և կիբերհանցագործությունների դեմ պայքարի մասնագետների կողմից իրականացված հետաքննության ընթացքում հայտնաբերվել են FETO-ի ճյուղավորված կառույցներ։
Պարզվել է, որ դրանցում ընդգրկված են Ժանդարմերիայի գլխավոր հրամանատարությունը և անվտանգության մասնավոր ընկերությունները։ 33 կասկածյալների ձերբակալության օրդեր են տրվել 26 նահանգներում։ Կասկածյալների թվում են նախկին ենթասպաներ և կուրսանտներ, որոնք նախկինում հեռացվել են ակադեմիայից:
Հիշեցնենք, որ 2016 թվականի հուլիսի 15-ին Թուրքիայի զինված ուժերի մի խումբ զինվորականներ և սպաներ պետական հեղաշրջման փորձ էին կատարել։ Անկարան հեղաշրջման նախապատրաստման մեջ մեղադրում է ԱՄՆ-ում բնակվող իսլամական քարոզիչ Ֆեթուլլահ Գյուլենին և նրա հետ կապված FETO-ին։
Տաթև Ֆռանգյան
