16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
Ալեքսանդր Լուկաշենկոն՝ «Տարվա կոռուպցիոներ»․ OCCRP-ի ցուցակում ներառված է նաև Թուրքիայի նախագահը
Քաղաքականություն
29.12.2021 | 21:34
Կոռուպցիայի և կազմակերպված հանցավորության ուսումնասիրության կենտրոնը (OCCRP) Բելառուսի նախագահ Ալեքսանդր Լուկաշենկոյին շնորհել է «Տարվա կոռուպցիոներ 2021» կոչումը։
Ժյուրին, որի կազմում ներառված են եղել կոռուպցիայի դեմ պայքարի ոլորտի 6 լրագրողներ և փորձագետներ, ընտրել են Լուկաշենկոյին ռեկորդային՝ 1166 թեկնածուից, որոնք առաջադրվել են ընթերցողների ու գործընկերների կողմից։ Նշվում է, որ առաջին անգամ «տարվա կառուպցիոներն» ընտրվել է միաձայն։
«Կոռուպցիայի տեսակետից «հիանալի» տարի էր, սակայն Լուկաշենկոն գերազանցեց բոլորին»,- որոշումն այսպես է մեկնաբանել OCCRP-ի հիմնադիր և ժյուրիի համակարգող Դրյու Սալիվանը։
OCCRP-ն գրում է, թե ինչով է աչքի ընկել Լուկաշենկոն անցնող տարում։ Մասնավորապես, նա կազմակերպել է պետական միջոցների հոսք օլիգարխներին, որոնք մտերիմ են իր ընտանիքին, հրահանգել է Մինսկում իջեցնել Ryanair ավիաընկերության մարդատար ինքնաթիռը, որում եղել է բելառուս այլախոհ ՝ խախտելով միջազգային օդային իրավունքը, միգրացիոն ճգնաժամ է հարուցել՝ հազարավոր միգրանտների բերելով ԵՄ-ի հետ Բելառուսի սահման, ապատեղեկատվություն է տարածել կորոնավիրուսի և դրա բուժման մեթոդների մասին։
Ժյուրիի մեկ այլ անդամ՝ Լուիզա Շելլին ասել է, որ խոցելի մարդկանց ներքաշելով քաղաքական խաղերի մեջ՝ Լուկաշենկոն ցույց է տվել ցինիզմի ու դաժանության նոր մակարդակ։ Շելլիի խոսքով՝ Լուկաշենկոն «օգտագործել է բելառուսական կառավարության հանցավոր ու կոռուպցիոն ցանցերը՝ զանգվածային միգրացիա հրահրելու համար, որն առաջացրել է հուսահատություն, բռնություն և անսահման դաժանություն»։
67-ամյա Ալեքսանդր Լուկաշենկոն Բելառուսում իշխանության ղեկին է 1993 թվականից։ Նշվում է, որ նրա իշխանությունը նշանավորվել է կեղծված ընտրություններով, քննադատների խոշտանգումներով, ձերբակալություններով և ցուցարարների ծեծով։
Եզրափակչի մասնակիցների շարքում են եղել Աֆղանստանի պաշտոնանկ արված նախագահ Մուհամմադ Աշրաֆ Ղանի Ահմադզայը, Սիրիայի նախագահ Բաշար Ասադը, Թուրքիայի նախագահ Ռեջեփ Թայիփ Էրդողանը և Ավստրիայի նախկին կանցլեր Սեբաստիան Կուրցը։
Նշվում է, որ Էրդողանը ղեկավարում է կոռումպացված կառավարությունը, որն իրանական նավթի համար չինական վճարումները լվանում է պետական բանկերի միջոցով։
Հավելենք, որ OCCRP-ի կողմից տարվա կոռուպցիոներ կոչմանը տարբեր տարիների արժանացել են Ադրբեջանի նախագահ Իլհամ Ալիևը, նրա հետ կոռուպցիոն գործարքներում ներգրավված Մալթայի նախկին վարչապետ Ժոսեֆ Մուսկատը, Բրազիլիայի նախագահ Ժաիր Բոլսոնարուն և այլ երկրների ղեկավարներ։
Էմմա Չոբանյան
