Ռուսաստանը, Իրանն ու Թուրքիան պայմանավորվել են Թեհրանում գագաթնաժողով անցկացնել

Ռուսաստանը, Իրանն ու Թուրքիան պայմանավորվել են Թեհրանում Աստանայի ձևաչափով գագաթնաժողով անցկացնել 2022 թվականի փետրվար-մարտին՝ համավարակային իրավիճակից կախված։ Այս մասին հայտարարել է ՏԱՍՍ-ին Իրանի ԱԳ նախարարի քաղաքական հարցերով հատուկ խորհրդական Ալի Ասղար Հաջին։

«Այն ծրագրվում է։ Մենք պատրաստվում ենք այն անցկացնել հաջորդ տարվա սկզբին։ Դա կախված է լինելու համավարակի իրավիճակից։ Բայց, ընդհանուր առմամբ, մենք պայմանավորվել ենք գագաթնաժողովի անցկացման շուրջ»,- ասել է իրանցի դիվանագետը։

Հաջին նշել է, որ գագաթնաժողովի անցկացման հարցը եղել է Նուլ Սուլթանում կայացած բանակցությունների օրակարգում և արտացոլվելու է առանձին կետով, երկրների ամփոփիչ հայտարարության մեջ։

Պատասխանելով հարցին՝ արդյո՞ք գագաթնաժողովին նախորդելու են Իրանի, Թուրքիայի և ՌԴ ԱԳ նախարարների բանակցությունները, դիվանագետը նշել է․ «Այո՛, մենք պայմանավորվել ենք այդ հարցում։ Հունվարին կամ փետրվարի սկզբին մենք անցկացնելու ենք ԱԳ նախարարների հանդիպում, որից հետո էլ՝ գագաթնաժողովը»։

Իրանցի դիվանագետը նաև հայտնել է, որ Սիրիայի հարցով հաջորդ միջազգային հանդիպումը Աստանայի ձևաչափով կայանալու է ՌԴ, Իրանի և Թուրքիայի գագաթնաժողովից մի քանի շաբաթ անց։

2020 թվականի հուլիսի 1-ին ՌԴ-ի, Իրանի և Թուրքիայի նախագահներն առցանց գագաթնաժողով էին անցկացրել՝ նվիրված սիրիական կարգավորմանն ու քննարկել դեմ առ դեմ հանդիպման հնարավորությունը, որը կանցկացվի Թեհրանում, երբ համավարակային իրավիճակը թույլ տա։

Էմմա Չոբանյան