20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Անկարայում և Ստամբուլում հազարավոր աշխատողներ բողոքի ակցիա են անցկացրել՝ կառավարության հրաժարականի պահանջով․ ԼՈւՍԱՆԿԱՐՆԵՐ
Քաղաքականություն
20.12.2021 | 22:19
Թուրքիայի Պետական աշխատողների առևտրային արհմիությունը (KESK) Անկարայում և Ստամբուլում բողոքի երթեր է կազմակերպել հազարավոր աշխատակիցների մասնակցությամբ՝ «Մենք չենք կարող ապրել, ապրուստ վաստակել» կարգախոսով, գրում է Bianet-ը։
Դիարբեքիրում և Իզմիրում անցկացված հանրահավաքներից հետո KESK-ը բողոքի երթ է անցկացրել մայրաքաղաք Անկարայում հազարավոր մարդկանց, այդ թվում՝ քրդամետ Ժողովուրդների դեմոկրատական, Ժողովրդահանրապետական, Թուրքիայի աշխատավորների, Սոցիալիստական, Կոմունիստական, կուսակցությունների, նաև այլ արհմիությունների ներկայացուցիչների մասնակցությամբ։
Բողոքի ակցիայի ընթացքում հազարավոր աշխատողներ ու պետական ծառայողներ վարկարկել են «Կառավարություն, հրաժարակա՛ն տուր» կարգախոսը։
Դիմելով մասնակիցներին՝ KESK-ի համանախագահ Մեհմեթ Բոզգեյիկը մտահոգություն է հայտնել, որ մարդիկ օրեցօր աղքատանում են։
«Մեր աշխատավարձերը գրպանից դուրս են գալիս՝ դեռ չմտած»,- ասել է Բոզգեյիկը և թվարկել իրենց պահանջները՝ «Ապրելու համար բյուջեում մեր բաժինն ենք ուզում», «Ցանկանում ենք վերջ տալ հանրությանը մաքրելուն ու սեփականաշնորհման գողությանը», «Մենք ցանկանում ենք բյուջե ժողովրդի համար», «Ցանկանում ենք վերջ տալ անարդար հարկերին»։
Ստամբուլում էլ աշխատողները հավաքվել են Քարթալ հրապարակում։ Նրանց միացել են նաև հարյուրավոր մարդիկ հարևան Քոջեյլի, Սաքարյա, Էդիրնե, Թեքիրդաղ քաղաքներից։
Նշենք, որ թուրքական լիրայի շարունակվող արժեզրկման ֆոնին սոցիալական իրավիճակը Թուրքիայիում գնալով լարվում է։ Այսօր լիրան ևս մեկ արժեզրկման ռեկորդ է գրանցել՝ գերազանցելով մեկ դոլարի դիմաց 17 լիրայի շեմը։
Էմմա Չոբանյան
