Քաղաքականություն
19.12.2021 | 18:48
«Հարավային Կովկասի հարցերով «3+3» խորհրդատվական տարածաշրջանային հարթակի հաջորդ նիստը հավանաբար տեղի կունենա Թուրքիայում, Անկարան ակնկալում է Վրաստանի մասնակցությունը: Այս մասին կիրակի Իսլամաբադում հայտարարել է Թուրքիայի արտգործնախարար Մեւլութ Չավուշօղլուն ՝ Աֆղանստանի հարցով Իսլամական համագործակցության կազմակերպության անդամ երկրների ԱԳ նախարարների 17-րդ արտահերթ հանդիպման արդյունքներով։
«Ջեյհուն Բայրամովի հետ քննարկել ենք Ալիևի և Նիկոլ Փաշինյանի հանդիպումը Բրյուսելում, Մոսկվայում կայացած «3+2» հարթակի նիստը, որն անցել է փոխարտգործնախարարների մակարդակով։ Դրան չի մասնակցել Վրաստանը, սակայն հավատում ենք, որ կմասնակցի հաջորդ նիստին, որը, ինչպես ակնկալում ենք, տեղի կունենա Թուրքիայում»,- ТАСС-ի փոխանցմամբ՝ նշել է հանրապետության ԱԳ նախարարը։
«Ավելի վաղ մենք հայտարարել էինք, որ հատուկ ներկայացուցիչ կնշանակենք Հայաստանի հետ ուղղակի շփումների համար։ Հայաստանը նաև նշանակել է իր հատուկ ներկայացուցչին։ Որոշ ավիաընկերություններ հարցումներ են ունեցել (Թուրքիայի և Հայաստանի միջև) թռիչքների կազմակերպման վերաբերյալ, և դրանցից մի քանիսը մենք կբավարարենք»,- նշել է Չավուշօղլուն։
«Հարավային Կովկասի վերաբերյալ բոլոր որոշումներն ընդունում ենք եղբայրական Ադրբեջանի հետ», – հավելել է նախարարը:
Հիշեցնենք, որ օրեր առաջ Թուրքիայի արտաքին գործերի նախարար Մևլութ Չավուշօղլուն հայտարարել էր, որ պաշտոնական Երևանը և Անկարան հարաբերությունների կարգավորմանն ուղղված հստակ քայլեր ձեռնարկելու պատրաստակամություն են հայտնում և երկուստեք հատուկ ներկայացուցիչներ կնշանակեն: Երևանը նույնպես հաստատել էր լուրը՝ նշելով, որ պատրաստ ենք հարաբերությունների կարգավորման՝ առանց նախապայմանների։ Օրեր անց Թուրքիան հայտնել էր, որ Հայաստանի հետ բանակցություններում որպես իր հատուկ ներկայացուցիչ կնշանակի ԱՄՆ-ում Թուրքիայի նախկին դեսպան Սերդար Քըլըչին։
Հայաստան-Թուրքիա երկխոսության գործընթացում Հայաստանի հատուկ ներկայացուցիչը կլինի ՀՀ ԱԺ նախագահի տեղակալ Ռուբեն Ռուբինյանը։
