Հայկ Մարությանը «սև՞», թե՞ «սպիտակ». նա պե՞տք է հեռանա քաղաքապետի պաշտոնից. հարցում Երևանում

«Սև՞», թե՞ «սպիտակ»․ Երևանի քաղաքապետի՝ 2018 թվականի ընտրությունների նախընտրական քարոզարշավի ժամանակ «Իմ Քայլը» դաշինքի առաջադրած թեկնածուի հայտնի արտահայտությունը բուռն քննադատությունների արժանացավ։ Նրան մեղադրեցին հասարակությունը բևեռացնելու, բաժանարար գծեր քաշելու մեջ։ «Սևերի» և «սպիտակների» թեզն առաջ քաշած Մարությանն այժմ «սևերի բևեռում» հայտնվելու վտանգի տակ է․ Երևանի ավագանու «Իմ քայլը» խմբակցությունը պատրաստվում է նրան անվստահություն հայտնել։

Խմբակցության ղեկավար Արմեն Գալջյանը Factor.am-ին երեկ հայտնեց, որ նման գործընթաց սկսելու պատճառը քաղաքական խնդիրներն են՝ այլ մանրամասներ չհրապարակելով։ Քաղաքապետին պաշտոնանկ անելու համար անհրաժեշտ է ավագանու անդամներից առնվազն 33-ի ստորագրությունը։ Նախնական տվյալով՝ իշխող խմբակցությանն արդեն իսկ հաջողվել է ապահովել ստորագրությունների անհրաժեշտ քանակը։ Հայկ Մարությանը, կարծես, ինքնակամ հեռանալու մտադրություն չունի․ նա այսօր գրառում արեց ֆեյսբուքում՝ շնորհակալություն հայտնելով երևանցիներին ջերմ խոսքերի և աջակցության համար։ Արդյո՞ք Հայկ Մարությանը պետք է հեռանա քաղաքապետի պաշտոնից, թե՞ ոչ․ երևանցիների վերաբերմունքը փորձել ենք պարզել հարցումների միջոցով։

Հարցված քաղաքացիների մեծ մասը գոհ է Հայկ Մարությանի աշխատանքից, մի մասն էլ նշում է, որ քաղաքապետը չի կատարել իր խոստումները, ուստի՝ պետք է հեռանա, ոմանց համար էլ տարբերություն չկա՝ Հայկ Մարությանը կհեռանա՞, թե՞ կշարունակի պաշտոնավարել։

Մանրամասները՝ տեսանյութում։

Արփի Հակոբյան