Եթե Զանգեզուրում միջանցք տաք, ուզելու են ողջ Զանգեզուրը․ թուրքին պետք է պարտադրել, ոչ թե համակերպվել․ Տիրան Լոքմագյոզյան․ ՏԵՍԱՆՅՈՒԹ

Factor TV–ի հարցազրույցը թուրքագետ Տիրան Լոքմագյոզյանի հետ

-Գաղտնիք չէ, որ Թուրքիան և Հայաստանը հատուկ ներկայացուցիչներ պետք է նշանակեն հարաբերությունների կարգավորման հարցով, նաև Թուրքիա-Երևան ուղիղ չվերթներ են լինելու: Դուք օրերս եք վերադարձել Թուրքիայից, մինչև հիմա չկար ուղիղ չվերթ, ինչպե՞ս էիք գնում Թուրքիա։ Ձեր գնահատմամբ՝ սա ի՞նչ գործընթաց է:

-Չվերթներ եղել են 1993-94 թվականներին սահմանները փակելուց հետո, մի քանի տարի հետո չարթերային ոչ պետական թռիչքներ սկսվեցին, այսօր ևս Չավուշօղլուն խոսում է չարթերային թռիչքների, ոչ թե «Թուրքական ավիաուղիների» չվերթների մասին: Դա նոր բան չէ, չվերթները միշտ եղել են, և կար ժամանակ, որ երկու ընկերություններ էին աշխատում Երևան-Ստամբուլ ուղղությամբ: Սակայն վերջին տարիներին ընդհատվեցին՝ կորոնավիրուսի համավարակից առաջ: Այդ ընկերությունը սնանկացավ, առերևույթ հարցը քաղաքական չէր: Այս պահին չկա չվերթ: Չարթերային թռիչքների մասին Չավուշօղլուի խոսելը խաբեություն է, աչքակապություն է:

-Թուրքիայում կա՞ն քննարկումներ հայ-թուրքական հարաբերությունների կարգավորման  մասին, թե՞ միայն Հայասանում կան այդպիսի քննարկումներ:

-Չէ՛, Թուրքիայում վերջին տարիներին առաջնային չի եղել հայ-թուրքական հարաբերությունների կարգավորման հարցը: Այս պատերազմի պատճառով օրակարգում է, բայց և՛ դրանից առաջ, և՛ դրանից հետո առաջնային խնդիր չէ, Թուրքիայի քաղաքականության հիմնական կետերից մեկը չէ։ Եթե Չավուշօղլուն այդ հայտարարությունն անելիս ուրախ էր, նշանակում է՝ մենք պետք է տխրենք, կարծում եմ՝ ինչ-որ բան ստացել է: Իմ մտավախությունն էր, որ թուրքերին ինչ-որ բաներ կզիջենք, քանի որ հայկական կողմը շատ է խոսում Թուրքիայի հետ բարիդրացիական հարաբերությունների հաստատման, խաղաղության, առևտրի մասին, դա չի լինի, եթե մենք Թուրքիային ինչ-որ բաներ չզիջենք: Թուրքիան 30 տարի է՝ այն կետի վրա է, որ երեք նախապայմանի կատարման դեպքում միայն պատրաստ կլինի դիվանագիտություն սկսել: Եվ հիմա բանագնաց նշանակել՝ նշանակում է դիվանագիտական հարաբերություն սկսել, թեկուզև դիվանագիտական ամենացածր մակարդակի»:

Հարցազրույցն՝ ամբողջությամբ՝ տեսանյութում։

Ռոբերտ Անանյան