29.06.2026 | 00:59
ԱԱ-2026. Վերջին վայրկյաններին հաղթական գոլ` փլեյ-օֆֆի մեկնարկային խաղում. ՏԵՍԱՆՅՈՒԹ
Թուրքիայում երեք լրագրողի տնային կալանքի են ենթարկել՝ տնտեսության վատթարացման վերաբերյալ փողոցում արված հարցումների համար
Քաղաքականություն
14.12.2021 | 23:30
Թուրքիայի իշխանությունները տնային կալանքի են դատապարտել երեք անկախ լրագրողների, որոնք ձերբակալվել էին Թուրքիայի քաղաքացիների հետ վատթարացող տնտեսության վերաբերյալ հարցազրույցների պատճառով, գրում են թուրքական լրատվամիջոցները։
Լրագրողները, որոնց յութուբյան ալիքները հայտնի են փողոցներում արվող հարցազրույցներով, դեկտեմբերի 13-ին տնային կալանքի են ենթարկվել։ Նրանցից Հասան Քյոքսոյը վարում է «Kendine Muhabir» յութուբյան ալիքը, ինչպես նաև Արիֆ Քոջաբըյքը և Թուրան Քուրալը՝ İlave TV հարթակից։ Նրանք ձերբակալվել են կիրակի, ըստ տեղեկությունների՝ իշխող «Արդարություն և զարգացում» կուսակցության պատգամավոր Մուջահիտ Բիրինջիի բողոքի պատճառով։
Երեք լրագրողներն էլ քաղաքացիների հետ զրուցել են ֆինանսական խնդիրների մասին։ Նրանք փողոցներում մարդկանց հարցրել են, թե ինչ են մտածում Թուրքիայի ներկա տնտեսական իրավիճակի մասին։ Մարդկանց մեծամասնությունը բողոքել է տնտեսական ծանր կացությունից, իսկ տեսանյութերն ակտիվորեն տարածվել են սոցցանցերում։
Թվիթերի օգտատերերը քննադատել են ձերբակալությունները՝ նշելով, որ այդ քայլով փորձ է արվում լռեցնել ընդդիմությանը։ «Մենք չենք լռելու» արտահայտությունը դարձել է Թվիթերի թրենդներից մեկը։
Հավելենք, որ թուրքական լիրայի պատմական արժեզրկումների հետևանքով երկրում տնտեսական ճգնաժամը գնալով խորանում է, համատարած գնաճ է։ Նախօրեին էլ թուրքական լիրան արժեզրկման հերթական ռեկորդն էր սահմանել՝ գերազանցելով մեկ դոլարի դիմաց 14 լիրայի ցուցանիշը։
Էմմա Չոբանյան
