08.06.2026 | 23:12
Երևանի և 8 մարզի մի շարք հասցեներում էլեկտրաէներգիաայի անջատումներ կլինեն
Երևանում կայացել է «Նոր սերունդ 2021» համաժողովը
13.12.2021 | 23:05
Տեղի է ունեցել «Ռոսսոտրուդնիչեստվոյի» «Նոր սերունդ 2021» ծրագրի հոբելյանական՝ 10-րդ համաժողովը՝ շրջանավարտների և ծրագրի պոտենցիալ շահառուների մասնակցությամբ, տեղեկացնում են ԿԳՄՍՆ-ից։
Միջոցառմանը ներկա են եղել և ողջույնի խոսքով հանդես եկել ՀՀ ԿԳՄՍ նախարարի տեղակալ Կարեն Թռչունյանը, ԲՏԱ նախարարի տեղակալ Դավիթ Սահակյանը, Հայաստանում ՌԴ արտակարգ և լիազոր դեսպան Սերգեյ Կոպիրկինը և «Ռոսսոտրուդնիչեստվոյի» ղեկավար Եվգենի Պրիմակովը, որը մասնակցել է առցանց:
«Նոր սերունդ» ծրագիրը գործում է 2011 թվականից, և այս ընթացքում ավելի քան 350 հայ երիտասարդ առաջնորդներ հնարավորություն են ունեցել այցելելու ՌԴ և հաստատելու մասնագիտական կապեր, կառուցելու երկարատև գործընկերային հարաբերություններ պետական և ոչ պետական համակարգերի ներկայացուցիչների, երիտասարդական և հասարակական կազմակերպությունների հետ:
Ծրագիրը յուրահատուկ հնարավորություն է հայաստանյան բուհերի ուսանողների համար՝ ներկայացնելու իրենց նախագծերը պետական համակարգում և բիզնես ոլորտում:
Համաժողովի ներկաներին առցանց ձևաչափով ողջունել է Եվգենի Պրիմակովը և նշել, որ թեև համաճարակը խախտել է ծրագրի որոշ ձևաչափեր, բայց այն որակապես չի տուժել: Ըստ նրա՝ «Նոր սերունդ» ծրագիրը «Ռոսսոտրուդնիչեստվոյի» բոլոր ուղղությունների համար կարևոր ռեսուրս է և միավորում է այնպիսի ոլորտներ, ինչպիսիք են կրթությունը, մշակույթը, գիտությունը, աշխատաշուկան և այլն:
Դեսպան Սերգեյ Կոպիրկինն էլ իր հերթին ընդգծել է, որ ծրագրի գլխավոր միտքն այն է, որ մասնակիցները չսահմանափակվեն ՌԴ այցով, այլ զարգացնեն այն նոր կապերի ու փոխհարաբերությունների հաստատման համատեքստում և ապահովեն դրանց շարունակականությունը:
«Հայաստանից շուրջ 400 երիտասարդ է մասնակցել ծրագրին, ինչը փաստում է մեր երկրների բարեկամական հարաբերությունների մասին»,- ասել է դեսպանը:
Ծրագիրը նպաստում է բուհերի և գործատուների միջև կապի ամրապնդմանը և օգնում է երիտասարդներին դառնալ հասարակության լիարժեք անդամ՝ իրականացնելու իրենց հեռահար նպատակները, որոնք ձեռք են բերում բարձրագույն կրթություն ստանալիս:
Արժևորելով ծրագրի դերը այս տիրույթում՝ ԿԳՄՍ նախարարի տեղակալ Կարեն Թռչունյանը շնորհակալություն է հայտնել կազմակերպիչներին և շնորհավորել հոբելյանական միջոցառման կապակցությամբ: Փոխնախարարը նշել է, որ օրեր առաջ՝ դեկտեմբերի 8-11-ը, Մոսկվայում կայացել է հայ-ռուսական երիտասարդական համաժողովը, որին մասնակցել են շուրջ 30 հայ երիտասարդ: Նպատակն էր 2 երկրների երիտասարդների միջև միջմշակութային և հումանիտար համագործակցության հաստատումը:
«Այս տեսակ համաժողովները նպաստում են ոչ միայն բարեկամական հարաբերությունների ամրապնդմանը, այլև տալիս են լրացուցիչ հնարավորություններ՝ համատեղ ծրագրեր նախագծելու և իրականացնելու,- ասել է փոխնախարարը և հավելել,- վստահ եմ՝ այսօրվա համաժողովը և քննարկվող թեմաները կօգնեն վեր հանել մերօրյա երիտասարդների առաջ ծառացած խնդիրները և գտնել դրանց արդյունավետ լուծումները»:
Համաժողովի շրջանակում տեղի են ունեցել Ա. Ն. Մարությանի «Սարդարապատ» փաստավավերագրական ֆիլմի պրեմիերան և դրա քննարկումը կինոքննադատի և պատմաբանի հետ:
