13.12.2024 | 18:50
Ուկրաինայի ինը էներգաբլոկներից հինգը կրճատել է հզորությունը ռուսական հարվածներից հետո. ՄԱԳԱՏԷ
Վրաստանում կուսակցություններից մեկն առաջարկել է ՀԱՊԿ-ին անդամակցություն՝ Աբխազիայի և Օսիայի դիմաց
Քաղաքականություն
13.12.2021 | 20:44
Եթե Վրաստանի տարածքային ամբողջականությունը վերականգնվի, Թբիլիսին կարող է Ռուսաստանի հետ խոսել Հավաքական անվտանգության պայմանագրի կազմակերպության հետ ինտեգրվելու մասին: Նման առաջարկով է հանդես եկել Վրաստանի նոր «Պահպանողական շարժում» կուսակցության առաջնորդ Զուրաբ Մախարաձեն։
Dalma News-ին տված հարցազրույցում քաղաքական գործիչը պատասխանել է հարցերին, թե ինչպես է կուսակցությունը տեսնում Վրաստանի ապագան և Ռուսաստանի հետ հարաբերությունները, գրում է EADaily-ն։
Մախարաձեի խոսքով՝ Վրաստանի թիվ մեկ խնդիրն անվտանգությունն է։
«Այնտեղ, որտեղ վաղը, մյուս օրը թշնամի պետության տանկը կարող է ներխուժել և պատերազմ սկսել, որքան էլ լավ օրենքներ ընդունվեն, բիզնես միջավայր ստեղծվի, ներդրումներ չեն արվի, բնակչությունն էլ չի ցանկանա ենթակառուցվածքներ ստեղծել, քանի որ Վրաստանում բոլորին նիհիլիզմի զգացում է պատել… Տարածքային ամբողջականությունն ուղղակիորեն կապված է անվտանգության հետ, քանի որ առանց տարածքային ամբողջականության վերականգնման՝ անհնար է լուծել Վրաստանի անվտանգության խնդիրը։ Անվտանգության խնդրի պատճառով մենք չենք կարող իրականացնել տրանսպորտային և հաղորդակցության միջանցքի գործառույթ՝ ինչպես Արևելք-Արևմուտք, այնպես էլ Հյուսիս-Հարավ ուղղությամբ։ Այդ թվում՝ տնտեսականը, որի միջոցով հնարավոր կլինի մուտք գործել ամենամեծ՝ ռուսական շուկա։ Վրացական ապրանքների համար շատ կարևոր էր, որ վերջին տարիներին հայտնվեցին այլ շուկաներում, սակայն ռուսական շուկայի լիարժեք փոխարինում տեղի չունեցավ»,- ասել է կուսակցության նախագահը։
Մախարաձեն պահպանողական շարժման գլխավոր նպատակն անվանել է «քրիստոնեական բարոյականության վրա հիմնված պետության ստեղծումը և Վրաստանի քաղաքացիների մեծամասնության մշակութային և կրոնական հայացքներին համապատասխանող օրենսդրություն ունենալը»։
Տաթև Ֆռանգյան
