17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
ԱՆ-ն առաջարկում է աշխատավարձի 50 տոկոսի չափով հավելավճար տրամադրել Վճռաբեկ դատարանի դատավորներին
Հասարակություն
09.12.2021 | 22:12
Արդարադատության նախարարարությունն առաջարկում է «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացում կատարելու մասին նախագիծ ընդունել, որով կնախատեսվի աշխատավարձերի 50 տոկոսի չափով հավելում վճարել Վճռաբեկ դատարանի դատավորներին։
Նախագիծն այսօր հանրային քննարկման է ներկայացվել «E-draft» իրավական ակտերի նախագծերի հրապարակման միասնական կայքում։ Առաջարկությունը նախարարությանը ներկայացրել է Բարձրագույն դատական խորհուրդը, ըստ որի՝ ներկայացված հիմնավորումներում որպես Վճռաբեկ դատարանի դատավորներին հավելում վճարելու հիմք է բերվել վերջիններիս գործունեության առանձնակի ռիսկայնությունը՝ հաշվի առնելով այն հանգամանքը, որ հակակոռուպցիոն գործերի քննության առանձնակի ռիսկայնությունը հավասարապես տարածելի է Վճռաբեկ դատարանի բոլոր դատավորների վրա:
Ըստ հիմնավորման՝ նշված դիրքորոշումը բխում է դատավարական օրենսդրությամբ սահմանված՝ տվյալ ատյանում գործերի քննության առանձնահատուկ կարգից: Որպես արդյունք ԱՆ-ն նշում է, որ նախագծի ընդունումը կհանդիսանա լրացուցիչ երաշխիք՝ գործերի արդարացի քննության ապահովման համար:
Օրինագիծը հասանելի կլինի հանրային քննարկման մինչև դեկտեմբերի 24-ը, ինչից հետո կքննարկվի Կառավարությունում և Ազգային ժողովում։ Ընդունվելուց հետո՝ օրենքն ուժի մեջ կմտնի պաշտոնական հրապարակման օրվան հաջորդող տասներորդ օրը:
Ռոզա Վարդանյան
