Քաղաքականություն
09.12.2021 | 22:20
Բրիտանական British Petroleum ընկերությունը մեծացնում է իր մասնաբաժինը Կասպից ծովի ադրբեջանական Շահ Դենիզ գազային հանքավայրում, գրում են ադրբեջանական լրատվամիջոցները։
Ընկերությունը նոր մասնաբաժինը գնելու է մալայզիական Petronas-ից։ BP-ն պայմանավորվել է գնել նախագծում Petronas-ի բաժնետոմսերի 1,16%-ը՝ 168 մլն դոլարով: Այս գումարը մալայզիական ընկերության հետ համաձայնեցվել է նույն կոմերցիոն պայմաններով, ինչ նախապես հայտարարված «Շահ Դենիզ» գործարքով։
Արդյունքում, նախագծում BP-ի մասնաբաժինը կկազմի 29․99 տոկոս, և ընկերությունը կդառնա հանքավայրի օպերատորը։ Սպասվում է, որ գործարքն ավարտվելու է 2022 թվականի հունվարի վերջին։
Նշենք, որ հոկտեմբերին էլ ռուսական Lukoil-ը հայտարարեց գազային նախագծում Petronas-ի ամբողջ՝ 15,5% բաժնեմասը 2,25 մլրդ դոլարով գնելու մասին։ Հիմա, երբ BP-ն որոշել է օգտվել իր նախապատվության իրավունքից, Lukoil-ի մասնաբաժինը նախագծում կարող է հասնել 24,34%-ի:
Շահ Դենիզ գազային հանքավայրը գտնվում է Կասպից ծովի ադրբեջանական հատվածում՝ Բաքվից 70 կմ հարավ-արևելք։ Ծրագիրն իրականացվում է արտադրության բաժնեմասի համաձայնագրով։ Նախագծի շրջանակում արտադրությունը սկսվել է 2006 թվականին։ Նախագծի մասնակիցներն են բրիտանական BP-ն (օպերատոր, բաժնետոմս 28,83%), թուրքական TPAO-ն (19%), Petronas-ը (15,5%), ադրբեջանական SOCAR-ը (10%), ռուսական Lukoil-ը (10%), իրանական NICO-ն (10%) և ադրբեջանական SGC (6,7%)։
Էմմա Չոբանյան
