Ռազմագերիները՝ քաղաքական շահարկումների կենտրոնում․ ի՞նչ վտանգներ կան․ ՔՆՆԱՐԿՈՒՄ

44-օրյա պատերազմից մեկ տարի անց Ադրբեջանը չի կատարում նոյեմբերի 9-ի հայտարարությամբ ստանձնած պարտավորությունները, ինչպես նաև միջազգային հանրության պահանջը՝ ամբողջությամբ չվերադարձնելով հայ ռազմագերիներին։ Հակառակը, հայ-ադրբեջանական սահմանին ռազմական բախումների ընթացքում մի քանի տասնյակ նոր գերեվարումների դեպքեր գրանցվեցին։

ՄԱԿ-ի Արդարադատության միջազգային դատարանը հրատապ միջոց կիրառելու հարցով օրերս ներկայացրեց որոշում, ըստ որի՝ Ադրբեջանում պահվող մարդիկ չպետք է ենթարկվեն անմարդկային կամ ստորացուցիչ վերաբերմունքի ազգային պատկանելության պատճառով, նրանք պետք է պաշտպանված լինեն բռնությունից և մարմնական վնասվածքներից։ Մինչ քաղաքակիրթ աշխարհից ակնկալում ենք աջակցություն՝ գերիներին վերադարձնելու հարցով և ճնշումներ Ադրբեջանի նկատմամբ, Հայաստանում գերիների թեման դառնում է քաղաքական բանավեճերի առարկա։

Factor TV-ի ուղիղ եթերում հրավիրված քննարկմանը մասնակցում են Եվրադատարանում հայ գերիների շահերի պաշտպան, փաստաբան Սիրանույշ Սահակյանը, ԱԺ Մարդու իրավունքների պաշտպանության և հանրային հարցերի հանձնաժողովի նախագահ Թագուհի Թովմասյանը, ՀԱԿ Իրավական հարցերի հանձնաժողովի քարտուղար Արմեն Խաչատրյանը, Իրազեկ քաղաքացիների միավորման ծրագրերի համակարգող Դանիել Իոաննիսյանը, իրավապաշտպան Զարուհի Հովհաննիսյանը, Հելսինկյան ասոցացիայի նախագահ Նինա Կարապետյանցը։