Քաղաքականություն
08.12.2021 | 21:53
Արաբական Միացյալ Էմիրությունների կառավարության պատվիրակությունը ժամանել է Անկարա՝ քննարկելու պաշտպանական արդյունաբերության ոլորտում հնարավոր համագործակցության հարցերը։ Այս մասին հայտնում է Bloomberg գործակալությունը, որին վկայակոչում է «Ահվալ»-ը։
Նշվում է, որ այս այցը տեղի է ունենում երկու հակառակորդ երկրների հարաբերությունների ջերմացման և ԱՄԷ-ի փաստացի ղեկավար, շեյխ Մոհամմեդ Բին Զայեդ ալ-Նահյանի՝ անցյալ ամիս Անկարա կատարած այցի ֆոնին։
Պարսից ծոցի երկրի պատվիրակության անդամները հանդիպել են Թուրքիայի պետական ռազմարդյունաբերության կոմիտեի նախագահության հետ, այնուհետ Անկարայում տեղակայված պաշտպանական ընկերությունների, այդ թվում՝ Aselsan-ի հետ բանակցություններ անցկացրել։ Այս մասին լրատվամիջոցին հայտնել է մի պաշտոնյա, որը ցանկացել է անանուն մնալ:
Աղբյուրը նաև հայտնել է, որ ԱՄԷ-ի պատվիրակության ներկայացուցիչները հանդիպել են թուրքական անօդաչու թռչող սարքեր արտադրողների հետ։
Ի դեպ, Թուրքիայի ռազմարդյունաբերության նախագահությունն ու Aselsan-ը չեն պատասխանել հանդիպումների մասին լրատվամիջոցի հարցերին։ Գործակալության զանգերին ու էլեկտրոնային նամակներին չի արձագանքել նաև ԱՄԷ-ի ԱԳ նախարարությունը։
Էմմա Չոբանյան
