03.06.2026 | 00:40
Փաշինյանը Էրդողանի հետ քննարկել է Ախալքալաք–Կարս երկաթուղով Հայաստանից արտահանումների հարցը
Ի՞նչ խնդիրների է բախվելու Հայաստանի տնտեսությունն ու բիզնեսը ԵՄ-ի GSP+ից զրկվելուց հետո․ «ՈՒՇԱԴՐՈՒԹՅԱՆ ԿԵՆՏՐՈՆՈՒՄ»․ ՏԵՍԱՆՅՈՒԹ
Տնտեսություն
08.12.2021 | 21:32
Factor TV-ի «Ուշադրության կենտրոնում» հաղորդաշարի հերթական թողարկմանն անդրադարձել ենք հունվարի 1-ից Եվրամիության GSP+ առևտրի արտոնյալ ռեժիմից դուրս մնալու հետևանքով Հայաստանի համար առաջացած խնդիրներին:
Պաշտոնական Երևանը GSP+ համակարգից օգտվելուց զրկվում է, քանի որ 2017թ., 2018թ. և 2019թ. Համաշխարհային բանկը Հայաստանը դասակարգել է միջինից բարձր եկամուտ ունեցող տնտեսությամբ երկրների շարքում։
Հաղորդման հյուրերից տնտեսագիտության թեկնածու, դոցենտ Ջուլիետա Թադևոսյանը հիշատակեց՝ Եվրամիությունը 2009 թվականից Հայաստանին հնարավորություն է տալիս օգտվել GSP+ (Արտոնությունների ընդհանրացված և համալրված համակարգ) ռեժիմից, ինչը թույլ էր տալիս մեր տնտեսվարողներին 6200 ապրանքատեսակ արտահանել Եվրամիության շուկա՝ զրոյական կամ նվազեցված մաքսատուրքերով:
«Տարիների այդ համագործակցությունը ցույց է տալիս, որ մեր գործարարները այնքան էլ այդ համակարգից չօգտվեցին։ Երբ նայում ենք դեպի Եվրամիություն մեր արտահանման կառուցվածքը, տեսնում ենք, որ արտահանում ենք հիմնականում հանքանյութ, որոշակի ոչ շշալցված գինենյութ, որոշակի հագուստ, սննդամթերքի որոշակի տեսակներ»,- ասաց նա՝ նշելով, որ արտահանման ապրանքատեսակների սահմանափակությունը խոսում է այն մասին, որ չենք կարողացել ապահովել մեր արտադրատեսակների որակը, որը կհամապատասխաներ եվրոպական ստանդարտներին։
Տնտեսագետ, կառավարման փորձագետ Կարեն Սարգսյանի խոսքով էլ՝ մինչև GSP+ համակարգի արտոնություններից վերջնականապես զրկվելը պետությանը տրվում է մեկ անցումային տարի՝ նախապատրաստվելու համար․ մեզ համար այդ տարին 2021-ն էր։
«Մեր տնտեսվարողները պետք է իրենց գործունեությունը համապատասխանեցնեին արդեն նոր պայմաններին։ Այդ ժամանակահատվածը քիչ չէր»,- ասաց նա։
Անցումային ժամանակահատվածում պետությունը, ըստ նրա, պետք է աջակցեր հայաստանցի տնտեսվարողերին՝ ճանաչողական միջացառումներ կազմակերպեր, օգներ մարքեթինգային միջոցառումների իրականացման, այլ շուկաներ փնտրելու հարցերում։
«Եթե մենք ցանկանում ենք, որ ինչ-որ ոլորտներ զարգացնենք, և ցանկանում ենք, որ Եվրամիությունում այդ ոլորտների ապրանքատեսակները ներկայացված լինեն, պետք է նրանց ներքին, թեկուզ ժամանակավոր արտոնություններ տանք։ Օրինակ՝ դա կարող ենք անել ժամացույցների արտադրության, վերամշակվող սննդի արդյունաբերության դեպքում և այլն»,- ասաց նա։
Մանրամասները՝ տեսանյութում։
Հռիփսիմե Հովհաննիսյան
