22.08.2026 | 21:13
Դիլիջան-Վանաձոր ճանապարհին ավտոմեքենան դուրս է եկել երթևեկելի հատվածից և բախվել հողաթմբին
Գերմանիան նոր դաշնային կանցլեր ունի․ ով է փոխարինել 16 տարի պաշտոնավարած Անգելա Մերկելին
Քաղաքականություն
08.12.2021 | 13:45
Սոցիալ-դեմոկրատ քաղաքական գործիչ Օլաֆ Շոլցը (Olaf Scholz) դեկտեմբերի 8-ին ընտրվել է Գերմանիայի նոր դաշնային կանցլեր։ Գերմանիայի կառավարությունը վերջին 16 տարիներին ղեկավարած Անգելա Մերկելի իրավահաջորդի օգտին քվեարկել է Բունդեսթագի 395 պատգամավոր, գրում է DW-ի ռուսական ծառայությունը։
Գերմանիայի Դաշնային Հանրապետության Սահմանադրության 63-րդ հոդվածի համաձայն՝ կանցլերն ընտրվում է խորհրդարանի՝ Բունդեսթագի կողմից խորհրդարանական ընտրություններից հետո և առաջարկում է դաշնային նախագահին հաստատման համար։ Ընտրվում է նա, ով ստանում է ձայների մեծամասնությունը՝ առնվազն 369։
Շոլցը հաղթանակ է տարել ոչ միայն իր ներկայացրած Գերմանիայի Սոցիալ-դեմոկրատական կուսակցության, այլև Կանաչների և Ազատ դեմոկրատական կուսակցության աջակցության շնորհիվ։ Հենց այս երեք քաղաքական ուժերն են կազմում ԳԴՀ-ում նոր իշխող կոալիցիան։
Օլաֆ Շոլցը կդառնա Գերմանիայի 9-րդ կանցլերը։ Քաղաքական գործիչը ծնվել է 1958 թվականին Օսնաբրյուկում, ուսանել է իրավաբանություն, անցել այլընտրանքային զինծառայություն և աշխատել որպես իրավաբան։ Շոլցը երկու անգամ եղել է Բունդեսթագի պատգամավոր՝ 1998-ից 2001 թվականներին և 2002-ից 2011 թվականներին։ 2007-2009 թվականներին աշխատել է ԳԴՀ կառավարությունում աշխատանքի նախարարի պաշտոնում, 2011-2018-ին եղել է Համբուրգի առաջին բուրգոմիստը, իսկ 2018 թվականի մարտից զբաղեցրել է ԳԴՀ ֆինանսների նախարարի պաշտոնը, միևնույն ժամանակ եղել է փոխկանցլեր։
Տաթև Ֆռանգյան
