16.12.2025 | 12:03
37-ամյա տղամարդը դանակահարել է հորն ու մորը․ ծնողները մահացել են, որդին ձերբակալվել է
Արթիկի բուժկենտրոնում պատվաստանյութերը սպառվել են
07.12.2021 | 22:01
Արթիկի բժշկական կենտրոնի պոլիկլինիկայում պատվաստանյութերը սպառվել են։ Այս մասին հայտնեց Factor.am ահազանգած քաղաքացին։
Նախօրեին քաղաքացիները գնացել են պոլիկլինիկա՝ պատվաստվելու, սակայն այստեղ ասել են, որ չեն կարող պատվաստել, քանի որ ՀՀ-ում առկա պատվաստանյութերից որևէ մեկը չունեն։
Առողջապահության նախարությունից Factor.am-ին պարզաբանեցին, որ պոլիկլինիկան ժամանակին պետք է հայտ ներկայացներ ՀՎԿԱԿ, որպեսզի այստեղից էլ պատվաստանյութերը տեղափոխվեին բուժկենտրոն։
«Արթիկի պոլիկլինիկան ժամանակին հայտ չի ներկայացրել, այդ պատճառով էլ որևէ պատվաստանյութ առկա չի եղել։ Առողջապահության նախարարությունը հորդորում է բոլոր պոլիկլինիկաներին՝ ճիշտ գնահատել կարիքը և ժամանակին ներկայացնել հայտը, որպեսզի քաղաքացին խնդրի առաջ չկանգնի»,- ասաց ԱՆ խոսնակ Հռիփսիմե Խաչատրյանը։
Պարզաբանում ստանալու նպատակով փորձեցինք կապ հաստատել նաև Արթիկի պոլիկլինիկայի տնօրենի հետ, սակայն մեր հեռախոսազանգերն անպատասխան մնացին։
Հիշեցնենք, որ Հայաստանում առկա են կորոնավիրուսի դեմ «ԱստրաԶենեկա», «Սպուտնիկ Վի», «Սինոֆարմ», «Մոդերնա» պատվաստանյութերը։ Ի դեպ՝ Հայաստանն էլ արտադրում է «Սպուտնիկ լայթ» պատվաստանյութը, որն առաջիկայում հասանելի կլինի պոլիկլինիկաներում։ Քաղաքացիներն այս պատվաստանյութը կարող են ստանալ որպես բուսթեր՝ խթանիչ 3-րդ դեղաչափ․ այսինքն՝ ամբողջական՝ 2 դեղաչափով պատվաստվածները վեց ամիս անց կարող են նաև ստանալ այս պատվաստանյութը։
Արփի Հակոբյան
