Ստամբուլի ընդդիմադիր քաղաքապետը բացահայտել է մեգապոլիսի իրական գնաճը՝ ավելի քան 50%

Ստամբուլի ընդդիմադիր քաղաքապետ Էքրեմ Իմամօղլուն, որը Թուրքիայի հիմնական ընդդիմադիր Ժողովրդահանրապետական կուսակցությունից է, հրապարակել է պլանավորման հանձնաժողովի կազմած տվյալները, որոնք ցույց են տալիս, որ կյանքը Ստամբուլում՝ երկրի ամենամեծ քաղաքում, վերջին տարում  թանկացել է 50․18 տոկոսով։ Սա ուղղակիորեն հերքում է Թուրքիայի պետական վիճակագրական ծառայության՝ TurkStat-ի տվյալները, ըստ որի՝ գնաճը կազմում է 21․31 տոկոս, գրում է Duvar-ը։

Գնաճի վերաբերյալ TurkStat-ի տվյալները երկար ժամանակ է՝ քննադատության են ենթարկվում Թուրքիայում՝ որպես ոչ ճշգրիտ թվեր։ Մինչ հոկտեմբերին TurkStat-ը հայտարարում էր, որ տարեկան գնաճը կազմել է 20 տոկոս, անկախ Inflation Research Group-ը հայտարարել է 50 տոկոսի մասին։

Իմամօղլուի թիմը՝ Ստամբուլի պլանավորման գործակալությունը, վարձակալության գների աճը վերջին մեկ տարում գնահատում է 71․6 տոկոս, սննդի գներն ավելի են աճել․ արևածաղկի ձեթը թանկացել է 137.59%-ով, ալյուրը՝ 109.14, շաքարավազը՝ 90.71, ձուն՝ 40%։-ով Թանկացել են նաև ամենօրյա առաջին անհրաժեշտության ապրանքները․ հեղուկ գազը՝ 102,72%-ով, իսկ, օրինակ, զուգարանի թուղթը՝ 90,75%-ով։

Այս թվերը նաև հաստատում են Ժողովրդահանրապետական կուսակցության ղեկավար Քեմալ Քըլըչդարօղլուի պնդումները, որ TurkStat-ը թաքցնում է գնաճի իրական թվերը։

Ստամբուլի պլանավորման գործակալությունը հավաքել է 321 տարբեր ապրանքների միջին գները քաղաքի 3000 տարբեր վայրերից։ Քաղաքապետ Իմամօղլուն սոցցանցի իր էջում գրել է, որ թվերն արտացոլում են իրական գնաճը։

Էմմա Չոբանյան