11.10.2026 | 14:46
Այսօր աղջիկ երեխաների միջազգային օրն է
Բանտում Սաակաշվիլիի մասնակցությամբ կադրերը հրապարակելու համար Վրաստանի ԱՆ-ն տուգանվել է 810 դոլարով
Քաղաքականություն
07.12.2021 | 17:32
Վրաստանի Արդարադատության նախարարությունը խախտել է «Անձնական տվյալների պաշտպանության մասին» օրենքը՝ հրապարակելով կադրեր, որտեղ երևում է, թե ինչպես է նախկին նախագահ Միխեիլ Սաակաշվիլին սնվում Ռուսթավի քաղաքի բանտում, ինչպես նաև տեղափոխվում բանտային հիվանդանոց։ Այս մասին ասվում է Վրաստանի պետական տեսչական ծառայության կայքում տեղադրված հաղորդագրության մեջ, գրում է ՏԱՍՍ-ը։
«Պետական տեսչական ծառայությունն ավարտել է Վրաստանի Արդարադատության նախարարության և Հատուկ քրեակատարողական ծառայության կողմից Միխեիլ Սաակաշվիլիի անձնական տվյալների կորզման և տարածման օրինականության ուսումնասիրությունը։ Պետական տեսուչի որոշմամբ՝ իրավախախտումների մի քանի դրվագներով վարչական պատասխանատվության են ենթարկվել Արդարադատության նախարարությունը և Հատուկ քրեակատարողական ծառայությունը»,- ասված է հաղորդագրության մեջ։
Նշվում է, որ տուգանքի չափը կազմում է 2,5 հազար լարի (մոտ 810 դոլար):
Ըստ պետական տեսչական ծառայության՝ նոյեմբերի 5-ին և 6-ին ԱՆ հատուկ քրեակատարողական ծառայությունը հրապարակել է լուսանկարներ և տեսանյութեր, որոնցում երևում է, որ Սաակաշվիլին սննդային հավելումներ է ընդունում՝ դրանով իսկ փորձելով ապացուցել, որ նախկին նախագահը բանտում հացադուլ չի արել։
Նոյեմբերի 8-ն և 11-ին հրապարակվել են լուսանկարներ, որոնցում երևում է՝ ինչպես է Սաակաշվիլին հեռանում բանտից և շտապօգնության մեքենայով տեղափոխվում բանտային հիվանդանոց: Կադրերում երևում է, որ վերջինս հրաժարվում է դուրս գալ մեքենայից, քանի որ ցանկանում էր քաղաքացիական հիվանդանոց գնալ, ոչ թե բանտային:
Տաթև Ֆռանգյան
