Քաղաքականություն
06.12.2021 | 17:20Բարդ չէ կռահել, թե փոխվարչապետները որ հարցի շուրջ չեն կարողանում գալ ընդհանուր հայտարարի: Այս մասին լրագրողների հետ զրույցում նշեց ԱԺ արտաքին հարաբերությունների մշտական հանձնաժողովի նախագահ Էդուրադ Աղաջանյանը:
«Տվյալ հանձնաժողովը կոմունիկացիաների բացման գործառույթների շրջանակներում է գործում, հետևաբար հարցերը և քննարկումները տվյալ ոլորտին են վերաբերում, յուրաքանչյուր կողմը փորձում է առավել արդյունավետ և առավել շահեկան դուրս գալ այդ քննարկումներից: Այս քննարկումների արդյունքում է, որ ի վերջո պետք է ընդհանուր հայտարարի գան, և ի հայտ գան այն կետերը, որոնց շուրջ պետք է կառուցվի փոխհամաձայնեցված տարբերակը»,- նշեց Աղաջանյանը:
Պատգամավորն ընդգծեց, որ Ղարաբաղյան հակամարտության միակ լուծումը պետք է տեղի ունենա ԵԱՀԿ Մինսկի համանախագահության ձևաչափի ներքո։
«Այս հանգամանքը պետք է կարևորվի նաև մեր ներքաղաքական դիսկուրսում, քանի որ սա մի դիրքորոշում է, որը կիսում են միջազգային հանրության գրեթե բոլոր կարևորագույն սուբյեկտները, այդ թվում Մինսկի խմբի համանախագահող երեք պետությունները»,- նշեց Աղաջանյանը։
Անդրադառնալով դիտարկմանը, որ ՀՀ վարչապետը պնդում է, թե Հայաստանն Արցախի անվտանգության երաշխավորն է, սակայն հայ պաշտոնյաներն Արցախ չեն կարողանում գնալ, Էդուարդ Աղաջանյանը նշեց՝ վարչապետի հայտարարությունն ապացուցման կարիք չունի։
«Կարելի է դրանում հավաստիանալ հսկայածավալ սոցիալական և տնտեսական ծրագրերին ծանոթանալու միջոցով։ Թե որ պաշտոնյան կգնա Արցախ կամ չի գնա, կարծում եմ՝ դա երկրորդական է»,- նշեց պատգամավորը։
Մանրամասները՝ տեսանյութում:
