Քաղաքականություն
03.12.2021 | 17:21
Վիեննայում միջուկային համաձայնագրի երկարաձգման շուրջ բանակցությունները լավ, բայց դանդաղ են ընթանում։ Այս մասին ուրբաթ Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելի հետ հեռախոսազրույցի ժամանակ հայտարարել է Իրանի արտգործնախարար Հոսեյն Ամիր Աբդոլլահիանը, գրում է Tasnim news agency-ն։
«Ամիր Աբդոլլահիանը շնորհակալություն է հայտնել ԵՄ արտաքին քաղաքականության ղեկավարին համագործակցության համար և բանակցային գործընթացը որակել լավ, բայց դանդաղ»,- ասված է Իրանի ԱԳՆ մամուլի ծառայության հաղորդագրության մեջ։
Դիվանագետի խոսքով՝ «բանակցություններում իրանական կողմի նպատակն է ամբողջությամբ դադարեցնել անարդար պատժամիջոցները»։
Ավելի վաղ Reuters-ը հայտնել էր, որ Վիեննայում Թեհրանի միջուկային ծրագրի շուրջ Համատեղ համապարփակ գործողությունների ծրագրի (JCPOA) շրջանակում բանակցությունների յոթերորդ փուլը կավարտվի ուրբաթ, որից հետո եվրոպացի մասնակիցները կվերադառնան իրենց երկրներ՝ շարունակելու խորհրդակցությունները: Միաժամանակ, ըստ իրանական լրատվամիջոցների, հաջորդ շաբաթ կողմերը կարող են վերադառնալ բանակցությունների սեղանի շուրջ։
Տաթև Ֆռանգյան
