Կորոնավիրուսի նոր՝ «օմիկրոն» շտամ է հայտնաբերվել Իսպանիայում, ԱՄՆ-ում, Ֆրանսիայում, Ավստրալիայում․ հիվանդները թեթև ախտանշաններ ունեն

Իսպանիայում, ինչպես նաև ԱՄՆ հինգ նահանգներում հայտնաբերվել են «օմիկրոն» շտամի առաջին դեպքերը։ Այս մասին գրում է Reuters գործակալությունը:

Մադրիդում «օմիկրոն» շտամը հայտնաբերվել է պատվաստված անձի մոտ, որը չի մեկնել ռիսկային երկրներ: Նմանատիպ ևս երկու դեպք է հայտնաբերվել։ Մադրիդում 62-ամյա տղամարդը, որը նոյեմբերի 29-ից թեթև ախտանիշներ է ունեցել, գտնվում է տանը՝ մեկուսացման մեջ, մարդիկ, ում հետ նա շփվել է, ևս մեկուսացված են։ Մյուս դեպքերում նույնպես վարակվածներն ունեցել են միայն թեթև ախտանիշներ և չեն մեկնել ռիսկային երկրներ։

Բացի այդ, «օմիկրոնի» դեպքեր են գրանցվել Նյու Յորքում, Քալիֆորնիայում, Կոլորադոյում, Մինեսոտայում և Հավայան կղզիներում: Մասնավորապես, Նյու Յորքում հաստատվել է կորոնավիրուսի «օմիկրոն» շտամով վարակման հինգ դեպք։ Քալիֆորնիա, Կոլորադո և Մինեսոտա նահանգները ևս հայտնել են «օմիկրոն» շտամով վարակման դեպքերի մասին այն մարդկանց շրջանում, որոնք լիարժեք պատվաստված են եղել և ունեցել են թեթև ախտանշաններ։

Ֆրանսիայի առողջապահության նախարար Օլիվյե Վերանը հայտնել է, որ Ֆրանսիայում ևս արձանագրվել են COVID-19-ի «օմիկրոն» շտամով վարակման դեպքեր։

«Ինը դեպք հաստատվել է հինգ տարբեր շրջաններում»,- ասել է Վերանը Franceinfo ռադիոկայանի եթերում։

ABC-ի հաղորդմամբ էլ՝ COVID-19 վիրուսի «օմիկրոն» շտամը հասել է նաև Ավստրալիայի մայրաքաղաք Կանբերա և հայտնաբերվել լիարժեք պատվաստված անձի մոտ, որը չի մեկնել արտերկիր: Միևնույն ժամանակ, երկրի Նոր Հարավային Ուելս նահանգի առողջապահության նախարար Բրեդ Հազարդն ասել է, որ ոչ մի նշան չկա, որ «օմիկրոն» շտամն ավելի վտանգավոր է, քան COVID-19-ի այլ շտամները:

«Մենք չենք տեսնում մարդկանց, որոնք շտապում են հիվանդանոցներ, և դա լավ է»,- հայտարարել է պաշտոնյան:

Նրա խոսքով՝ «օմիկրոնով» վարակվածները կա՛մ որևէ ախտանիշ չունեն, կա՛մ դրանք «շատ թեթև են»։

Տաթև Ֆռանգյան