24.04.2026 | 23:32
Կապանում ջրանջատում կլինի
2022-ին 274 միլիոն մարդ մարդասիրական օգնության կարիք կունենա․ ՄԱԿ
Քաղաքականություն
02.12.2021 | 23:06
Աշխարհում ավելի շատ մարդիկ են տառապում շարունակվող ռազմական հակամարտությունների, կլիմայի փոփոխության և COVID-19 համաճարակի հետևանքներից, հայտարարել են ՄԱԿ-ում: 2022 թվականին 274 միլիոն երեխաներ և մեծահասակներ Աֆղանստանում, Եթովպիայում և աշխարհի շատ այլ երկրներում կարող են պաշտպանության և հրատապ հումանիտար օգնության կարիք ունենալ, ասվում է հաջորդ տարվա Global Humanitarian Outlook-ում, որը պատրաստվել է ՄԱԿ-ի հումանիտար հարցերի համակարգման գրասենյակի կողմից և այսօր հրապարակվել, գրում է DW-ի ռուսական ծառայությունը։
Այսպիսով, մոլորակի յուրաքանչյուր 29-րդ բնակիչ կարիք ունի մարդասիրական օգնության և աջակցության։ Այս ցուցանիշը, ընթացիկ տարվա համեմատ, աճել է 17 տոկոսով։ 2021 թվականի նմանատիպ հարցումը ցույց է տվել, որ ամբողջ աշխարհում 250 միլիոն մարդ պաշտպանության կարիք կունենա։
«Աշխարհի 43 երկրներում մոտ 45 միլիոն մարդ, ամենայն հավանականությամբ, սովի խնդրին է բախվելու, ասվում է զեկույցում: ՄԱԿ-ին անհրաժեշտ է 41 միլիարդ դոլար (36 միլիարդ եվրո) աշխարհի ամենակարիքավոր մարդկանց՝ ավելի քան 180 միլիոն մարդու 63 երկրներում մարդասիրական օգնություն տրամադրելու համար»,-ասել է մարդասիրական հարցերով ՄԱԿ-ի գլխավոր քարտուղարի տեղակալ Մարտին Գրիֆիթսը:
«Առայժմ պայմանավորվածություն է ձեռք բերվել 17 միլիարդ դոլարի (15 միլիարդ եվրո) տրամադրման շուրջ՝ պահանջվող գումարի կեսից պակաս»,-ընդգծել է նա։ Գրիֆիթսը զարգացած երկրների կառավարություններին կոչ է արել մեծացնել ֆինանսական օգնությունը կարիքի մեջ գտնվող մարդկանց համար: Նրանցից շատերը, նրա խոսքով, ապրում են միայն տրամադրվող մարդասիրական օգնության հաշվին։
Տաթև Ֆռանգյան
