Քաղաքականություն
02.12.2021 | 12:49
Թուրքիայում լիրայի արժեզրկման և տնտեսական ճգնաժամի ֆոնին հրաժարական է տվել ֆինանսների և գանձապետարանի նախարար Լյութֆի Էլվանը, հայտնում են թուրքական լրատվամիջոցները։
Էլվանին փոխարինելու է նրա տեղակալ Նուրեդդին Նեբաթին։
Վերջերս նախագահ Ռեջեփ Թայիփ Էրդողանն անուղղակի քննադատել էր Էլվանին, որը, ըստ տեղեկությունների, դեմ էր նրա ցածր տոկոսադրույքի քաղաքականությանը, ինչն էլ հանգեցրեց լիրայի փոխարժեքի անկմանը։
Նոյեմբերի 17-ին Էրդողանն ասել էր․ «Ոչ մի վիրավորանք մեր ընկերներին, որոնց հետ մենք միասին քայլել ենք այս պայքարում։ Ես չեմ կարող լինել տոկոսադրույքները պաշտպանողների հետ միասին»։
Նշենք, որ Էլվանը նախորդ տարի նոյեմբերին ֆինանսների նախարարի պաշտոնում փոխարինել էր Էրդողանի փեսա Բերաթ Ալբայրաքին։ Նրա նշանակումն ընկալվում էր որպես վերադարձ ավանդական տնտեսական քաղաքականությանը։ Սակայն դա երկար չտևեց, քանի որ Կենտրոնական բանկը մարտից հետո դադարեցրեց տոկոսադրույքների բարձրացումը և մինչև սեպտեմբեր անփոփոխ պահեց տոկոսադրույքները։
Արդյունքում, թուրքական լիրան այս տարի ավելի քան 40 տոկոսով արժեզրկվեց։
Էմմա Չաբանյան
