Լավրովը մեկնաբանել է Բահչելիի՝ Էրդողանին նվիրած Թյուրքական աշխարհի քարտեզը

Ռուսաստանը ևս կարող է աշխարհի քարտեզը տարբեր գույներով ներկել՝ իր ցեղակիցների բնակության տարածքին համապատասխան, այդ գույները կընդգրկեն աշխարհի գրեթե բոլոր տարածաշրջանները։ Այս մասին հայտարարել է ՌԴ ԱԳ նախարար Սերգեյ Լավրովը՝ մեկնաբանելով Դևլեթ Բահչելիի կողմից Թուրքիայի նախագահ Ռեջեփ Էրդողանին նվիրած Թյուրքական աշխարհի քարտեզը, գրում է ՌԻԱ Նովոստին։

Ավելի վաղ էլ ՌԴ նախագահի մամուլի խոսնակ Դմիտրի Պեսկովն ափսոսանք էր հայտնել, որ թյուրքական աշխարհի քարտեզի վրա, որը նվիրել էին Էրդողանին, մեծ կարմիր աստղ չկա թյուրքական աշխարհի կենտրոնում, որը պատմականորեն գտնվում է Ռուսաստանի Դաշնությունում՝ Ալթայում։

«Ես որևէ վատ բան չեմ տեսնում ցեղակիցների հետ կապերի պահպանման մեջ։ Մենք ևս ունենք մեր ցեղակիցների ու հայրենակիցների նման արեալ, մենք ևս կարող ենք աշխարհի քարտեզը ներկել համապատասխան գույներով՝ դրանց տարբեր երանգավորում տալով։ Դա, իհարկե, առաջին հերթին ամբողջ հետխորհրդային տարածքն է, մեր հայրենակիցների հսկայական թիվը, որոնք ներկայացնում են ԽՍՀՄ ժողովուրդներին, Գերմանիայում ու Եվրոպայի այլ երկրներում, Իսրայելում, ԱՄՆ-ում, Լատինական Ամերիկայում»,- ասել է Լավրովը Դաշնային խորհրդում ունեցած ելույթում։

Նշենք, որ Թուրքիայի նախագահ Ռեջեփ Թայիփ Էրդողանին «Ազգայնական շարժում» կուսակցության ղեկավար Դևլեթ Բահչելին «Թյուրքական աշխարհի» քարտեզն էր նվիրել, որի մեջ մտնում են Ռուսաստանի հարավի շրջանների մի մասը, Արևելյան Սիբիրը, ինչպես նաև Բալկանները, Ադրբեջանը, Ղազախստանը, Ղրղզստանը, Ուզբեկստանը, Չինաստանի Սինցզյան-Ույղուրական ինքնավար շրջանը, Մոնղոլիայի և Իրանի որոշ տարածքներ:

Էմմա Չոբանյան