Թուրքիայում ընդդիմադիր քաղաքական գործիչ է կալանավորվել լրտեսության մեղադրանքով

Թուրքիայի ընդդիմադիր «Ժողովրդավարություն ու առաջընթաց» (DEVA) կուսակցության համահիմնադիր Մեթին Գյուրջանը ձերբակալվել է քաղաքական ու ռազմական լրտեսության մեղադրանքով, գրում է «Duvar»-ը։

Նոյեմբերի 26-ին Գյուրջանը հայտարարել էր, որ իրեն բերման են ենթարկել ոստիկանություն և խուզարկել Ստամբուլում իր բնակարանը։ Այնուհետև նրան տարել են Անկարայի ոստիկանության հակաահաբեկչական բաժին, որտեղ նրան հարցաքննել են։

Ոստիկանությունում նրան հարցրել են արտասահմանյան լրագրողների, դիվանագետների ու քաղհասարակության այլ ներկայացուցիչների հետ զրույցների բովանդակության մասին։ Գյուրջանը նաև պատասխանել է իր գրած հոդվածների և տարբեր հեռուստածրագրերում հարցազրույցների վերաբերյալ հարցերին։

Նոյեմբերի 29-ին Գյուրջանի գործն ուղարկվել է դատարան, նրան կալանավորելու որոշում է կայացվել։

Մեթին Գյուրջանը Թուրքիայի զինված ուժերի նախկին ծառայող է, ներկայում ռազմական վերլուծաբան և AL-Monitor լրատվականի սյունակագիր, լուսաբանում է բանակում տեղի ունեցող իրադարձությունները։ Նա Թուրքիայի նախկին փոխվարչապետ Ալի Բաբաջանին օգնել է ստեղծել DEVA կուսակցությունը։

Ընդդիմադիր գործիչը հերքում է իրեն առաջադրված մեղադրանքները։

Տեղեկություններ կան նաև, որ մեկ տարի է՝ թուրքական իշխանությունները վերահսկում են Գյուրջանին և գաղտնալսում նրա հեռախոսազանգերը։

Իր հերթին կուսակցության ղեկավար Ալի Բաբաջանը նշել է, որ իրենց կուսակցին մինչև վերջ աջակցելու են, և որ Գյուրջանի աշխատանքները հիմնված են բաց աղբյուրների վրա ու պետական գաղտնիք չեն պարունակում։

Էմմա Չոբանյան