Պուտինը՝ Ուկրաինա ռուսական զորք մտցնելու և Մոսկվայի կողմից հնարավոր պատասխանների մասին

ՌԴ նախագահ Վլադիմիր Պուտինը մեկնաբանել է Ուկրաինա ռուսական զորքերի հնարավոր ներխուժման մասին հայտարարությունները, որոնք սկսել են շրջանառվել այս աշնանից, գրում է korrespondent-ը։

Նա հայտարարել է, որ հարցը զորք մտցնելու մեջ չէ, պետք է հարաբերություններ հարթել, և եթե դա հաջողվի, ապա ոչ ոք սպառնալիք չի զգա։

«Տեսե՛ք, Ուկրաինա ռուսական զորքերի հնարավոր մուտքի մասին խոսում էին դեռևս տարեսզկբին․․․ Սակայն, ինչպես տեսնում եք, դա տեղի չունեցավ»,- ասել է նա «Ռուսաստանն է կանչում» ներդրումային ֆորումի ժամանակ։

«Խոսքը ոչ թե այնտեղ զորքեր մտցնել-չմտցնելու, կռվել-չկռվելու, այլ հարաբերությունները բարելավելու մասին է՝ ավելի արդար, կայուն զարգացում ստեղծելու և միջազգային գործունեության բոլոր մասնակիցների անվտանգության շահերը հաշվի առնելու համար։ Եթե մենք անկեղծորեն ձգտենք դրան, այդ դեպքում ոչ ոք որևէ սպառնալիք չի զգա»,- հավելել է Պուտինը։

Նա նաև սպառնացել է պատասխանել Ուկրաինային, եթե հայտնվեն Մոսկվային հարվածով սպառնացող համալիրներ։

«Եթե Ուկրաինայի տարածքում հայտնվեն ինչ-որ հարվածային համակարգեր, որոնց մինչև Մոսկվա թռիչքի ժամանակը կլինի 7-10 ժամ, իսկ հիպերձայնային զենքի տեղակայման դեպքում՝ 5 րոպե․․․ մենք ի՞նչ պետք է անենք։ Մենք այդ ժամանակ ստիպված կլինենք համանման մի բան ստեղծել նրանց նկատմամբ, ովքեր մեզ սպառնում են։ Իսկ մենք կարող ենք դա անել արդեն հիմա»,- ասել է Պուտինը։

Բացի այդ՝ նա հերթական անգամ հայտարարել է ՌԴ սահմաններին ՆԱՏՕ-ի մոտենալու մասին։

«Ռուսաստանի և արևմտյան հանրության, կոլեկտիվ Արևմուտքի հարաբերությունները 1990-ից 2000-ականների սկզբին գործնականում անամպ էին, ՆԱՏՕ-ի ինչի՞ն էր պետք ընդլայնվել մինչև մեր սահմանները։ Լավ՝ ինչո՞ւ, ո՞վ կարող է պատասխանել այս հարցին, խելամիտ պատասխան չկա»,- ասել է Պուտինը։

Տաթև Ֆռանգյան