19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Գյումրու քաղաքապետարանում հրաժարվել են ծառայողական մեքենաներից
Քաղաքականություն
29.11.2021 | 22:00
Գյումրու քաղաքապետարանում կրճատվել է ծառայողական մեքենաների թիվը․ փոխքաղաքապետերին ու բաժնի պետերին ամրակցված 12 մեքենաներից այս պահին թողել են ընդամենը 6-ը։ Այս մասին այսօր Factor.am-ի հետ զրույցում տեղեկացրեց Գյումրու քաղաքապետ Վարդգես Սամսոնյանը։
Նա ասաց, որ ինքն անձամբ հրաժարվել է ծառայողական մեքենայից՝ օրինակ ծառայելով մյուս աշխատակիցների համար։ Նա կերթևեկի իր անձնական «Մերսեդես» մակնիշի մեքենայով։
Ըստ քաղաքապետի` 6 մեքենաները հերթափոխով կսպասարկեն բոլոր բաժինների պետերին ու աշխատակիցներին, նրանք առանձին մեքենաներ չեն ունենա․ քաղաքապետարանի մի քանի բաժինների կցվել է մեկ մեքենա․ կլինի նաև հերթապահ մեքենա։
Վարդգես Սամսոնյանը նաև տեղեկացրեց, որ իրենք իրագործում են Գյումրու ՏԻՄ ընտրություններին մասնակցած «Հայրաքաղաք» դաշինքի նախընտրական ծրագրի՝ ծառայողական մեքենաներից հրաժարվելու դրույթը։
«Հայրաքաղաք» դաշինքի քաղաքապետի թեկնածու Լևոն Բարսեղյանի հետ զրուցելուց հետո են նման որոշում կայացրել։
«Քաղաքապետարանի հաշվեկշռում գտնվող ծառայողական մեքենաները շատ են հնացել, դրանք չափից ավելի ծախսատար են․ այս պահին նպատակահարամար չէ դրանք օգտագործելը, դա շքեղություն է, որը չենք կարող մեզ թույլ տալ։ Գյումրին հոգսաշատ քաղաք է, կբավարարվենք 6 մեքենայով», -ասաց Վարդգես Սամսոնյանը։
Արմիկ Մովսիսյան
