24.05.2026 | 11:59
Հրդեհ Երևանի Հրանտ Վարդանյան փողոցում
S-400-ից բացի ի՞նչ ռուսական զինատեսակներ կարող են հետաքրքրել Թուրքիային
Քաղաքականություն
06.04.2018 | 14:07
Թուրքիայի նախագահ Ռեջեփ Թայիփ Էրդողանն Անկարայում ռուսաստանցի պաշտոնակից Վլադիմիր Պուտինի հետ հանդիպումից հետո հայտարարել էր, որ պաշտպանական ոլորտում 2 երկրների միջև կնքված S-400 հակաօդային պաշտպանության համակարգերի (ՀՕՊ) պայմանագրից բացի այլ պայմանագրեր ևս կարող են կնքվել. փոխանցում է ermenihaber-ը:
Թեմայի վերաբերյալ մեկնաբանություններով է հանդես եկել Ռուսաստանի գիտությունների ակադեմիայի համաշխարհային տնտեսության և միջազգային հարաբերությունների ինստիտուտի առաջատար գիտաշխատող Վիկտոր Նադեին-Ռայևսկին:
«S-400 համակարգը մեր կողմից վաճառվող միակ զենքը չէ: Անկարայի հետ S-400 համակարգերի մասով մեր համագործակցությունը հարցականի տակ է դնում ԱՄՆ-ի կողմից F-35 կործանիչների մատակարարումը Թուրքիային: ԱՄՆ-ն Թուրքիային սպառնում է կործանիչների մատակարարման հնարավոր կասեցմամբ: Ի դեպ, ցանկանում եմ հիշեցնել, որ Թուրքիան Ռուսաստանից S-400 համակարգեր ձեռք բերող միակ երկիրը (ՆԱՏՕ-ի անդամ-խմբ.) չէ: Հունաստանը ավելի վաղ գնել է այդ համակարգերը և տեղակայել Կիպրոսում»,- նկատել է տվել է Ռայևսկին:
Ռուս մասնագետը նշել է, որ Թուրքիան միշտ ցանկանում է, որ իր գնած ռազմական տեխնիկան իր տարածքում արտադրվի:
«Սկզբունքորեն կարող ենք քննարկել այդ թեման»,- ավելացրել է Ռայևսկին:
Խոսելով այն թեմայով, թե ռուսական ինչ զենքեր կարող են հետաքրքրել Թուրքիային՝ ռուս մասնագետը դրանց շարքին է դասել հակահրթիռային պաշտպանության համակարգերը, համազարկային կրակի ռեակտիվ համակարգերը, կրակի աջակցման մեքենաները և այլն: Ըստ Ռայևսկու՝ Ռուսաստանում արտադրված այդ համակարգերը չեն զիջում իրենց «հակառակորդների» արտադրանքին: Ռայևսկին թուրքական կողմի հետաքրքրության շրջանակներից դուրս է համարել ռուսական զրահամեքենաները, քանի որ, ըստ նրա, Թուրքիան կարողանում է արտադրել սեփական զրահամեքենաները, և դրանցից բավականաչափ առկա է այդ երկրի սպառազինության մեջ:
«Եթե ԱՄՆ-ն ցանկանում է վատություն անել ինքն իրեն, ապա թող ավելի շատ դեմ դուրս գա S-400-ների մատակարարմանը Թուրքիային: Թուրքիան ԱՄՆ-ից ցանկացել էր «Patriot» համակարգեր գնել, սակայն մերժում էր ստացել: ԱՄՆ-ն պատրաստ էր համակարգերը վաճառելուն, բայց դրանք Թուրքիայում արտադրելուն՝ ոչ: ԱՄՆ-ի զենքի վաճառքի կարևոր սկզբունքներից մեկը վերահսկողություն իր ձեռքում պահելն է: Սակայն մեզ համար այդ հարցում որևէ խնդիր չկա, այդ պատճառով էլ մեզ հետ համագործակցության առումով հնարավորություններն ավելի մեծ են»,- եզրափակել է ռուս մասնագետը:
