19.05.2026 | 23:56
Հայաստանի մի շարք հասցեներում էլեկտրաէներգիայի անջատումներ կլինեն
Հյուսիսային Կորեայում ուսանողին մահապատժի են դատապարտել՝ «Կաղամարների խաղը» սերիալը երկիր գաղտնի մտցնելու համար
Քաղաքականություն
24.11.2021 | 23:14
Հյուսիսային Կորեայում մահապատժի է դատապարտվել մի ուսանող, որն իր հետ երկիր է բերել Netflix-ի «Կաղամարների խաղը» սերիալը։ Daily Mail-ի փոխանցմամբ՝ մաքսանենգը եղել է Չինաստանից վերադարձած մի ուսանող, որը թաքնված USB կրիչով իր հետ բերել է Հարավային Կորեայում մեծ ճանաչում վայելող սերիալը։
Դրա պատճենները մի քանի ուսանողների վաճառելուց հետո, սակայն, նա բռնվել է երկրի վերահսկողական ծառայությունների կողմից։
Տեղեկացվում է, որ նա մահապատժի կենթարկվի կրակոցի միջոցով․ այն սարսափելի մեթոդներից մեկով, որով սպանվում են նաև սերիալի հերոսները: Ենթադրվում է, որ ձերբակալությունը տեղի է ունեցել երկրի Հյուսիսային Համգյոն նահանգում, որը սահմանակից է Չինաստանին։
«Radio Free Asia»-ն հայտնել է, որ մեկ այլ ուսանող, որը գնել է սկավառակի պատճենը, ցմահ ազատազրկման է դատապարտվել, ևս վեցը, որոնք դիտել են այն, դատապարտվել են հինգ տարվա ծանր ռեժիմի աշխատանքի:
Հյուսիսային Կորեան խստիվ արգելում է Արևմուտքից և Հարավային Կորեայից նյութերի մուտքը երկիր, և պաշտոնյաներն այժմ խուզարկություններ են իրականացնում կրթական հաստատություններում՝ այլ արտասահմանյան ինֆորմացիա գտնելու համար:
Նշվում է, որ որոշ ուսուցիչներ ևս հեռացվել են աշխատանքից կամ որպես պատիժ՝ կարող են վտարվել հեռավոր հանքերում աշխատելու:
Տաթև Ֆռանգյան
