Քաղաքականություն
23.11.2021 | 23:31
Թուրքիայի նախագահ Ռեջեփ Թայիփ Էրդողանի իշխող «Արդարություն ու զարգացում» կուսակցության պատգամավոր Զուլֆու Դեմիրբաղը երկրի բնակիչներին առաջարկել է քիչ ուտել՝ տնտեսական ճգնաժամի և առաջին անհրաժեշտության մթերքների գների կտրուկ աճի պայմաններում, գրում է Duvar-ը։
«Մենք կարող ենք երկու լոլիկ գնել՝ երկու կիլոգրամի փոխարեն։ Առողջարար չէ ձմռանը ստիպված այդքան ուտելը։ Եթե մենք ուտում ենք երկու կգ միս ամսական՝ նորմալ պայմաններում, ապա հիմա կարող ենք կես կիլոգրամ ուտել»,- ասել է պատգամավորը։
Նա նշել է, որ «կարող են տնտեսական դժվարություններ ապրել, սակայն հայրենիքն առաջին տեղում է»։
«Մենք տեղ չունենք գնալու»,- ասել է Դեմիրբաղը։
Թուրքիայի գլխավոր ընդդիմադիր Ժողովրդահանրապետական կուսակցության (CHP) խոսնակ Ֆաիկ Օզթրակը քննադատել է պատգամավորին՝ մարդկանց տնտեսական դժվարությունները ծաղրելու համար։
«Սի՛րտ ունեցեք։ Մարդիկ չեն կարող հաց գնել, ուր մնաց՝ բանջարեղեն։ Նրանք կորցրել են ամոթի զգացումը և մարդկանց ծաղրում են»,- ասել է Օզթրակը՝ կրկնելով արտահերթ ընտրություններ անցկացնելու՝ իր կուսակցության կոչը։
Հավելենք, որ թուրքական լիրան շարունակում է արժեզրկվել, երկրի տնտեսությունը հայտնվել է ճգնաժամային իրավիճակում։ Կտրուկ բարձրացել են պարենային ապրանքների գները, խանութներում նույնիսկ առաջին անհրաժեշտության ապրանքների վաճառքը սահմանափակվել է։
Էմմա Չոբանյան
