Ինչ իրավիճակ է հայ-ադրբեջանական սահմանին․ ՊՆ-ից հերքում են վիրավոր ունենալու մասին լուրը

Հայ-ադրբեջանական սահմանին իրավիճակը հարաբերականորեն կայուն է․ Factor.am-ին հայտնեցին Պաշտպանության նախարարությունից։

Գեղամասար խոշորացված համայնքի ղեկավար Հակոբ Ավետյանը երեկ մեզ հետ զրույցում տեղեկացրել էր, որ փոխհրաձգության հետևանքով առնվազն մեկ վիրավոր ունենք, սակայն ՊՆ-ից հերքեցին այս տեղեկությունը։

Նշենք, որ նոյեմբերի 22-ին հայ-ադրբեջանական սահմանին փոխհրաձգություն էր սկսվել․ ժամը 18։10-ի սահմաններում Ադրբեջանի ԶՈւ ստորաբաժանումները տարբեր տրամաչափի հրաձգային զինատեսակներից կրակ էին բացել Գեղարքունիքի մարզի Նորաբակ գյուղի հատվածում տեղակայված հայկական դիրքերի ուղղությամբ։ Փոխհրաձգության հետևանքով զոհվել էր ՀՀ ՊՆ N զորամասի ժամկետային զինծառայող, շարքային Սուրեն Յուրիկի Սաֆարյանը։ Իրավիճակը համեմատաբար կայունացել էր ժամը 19։30-ի սահմաններում։

Հիշեցնենք, որ նոյեմբերի 16-ին էլ ադրբեջանական ԶՈւ-ն լայնածավալ հարձակում էր գործել ՀՀ արևելյան սահմանագոտու ուղղությամբ՝ կիրառելով հրետանային միջոցներ, զրահատեխնիկա և տարբեր տրամաչափի հրաձգային զինատեսակներ։ Հայկական կողմը դիմել էր համարժեք գործողությունների։ Ըստ Պաշտպանության նախարարության հրապարակած վերջին տվյալների ունենք 6 զոհ, 13 գերեվարված, շուրջ 24 անհետ կորած զինվոր, իսկ հակառակորդն ունի մինչև 70 զոհված և վիրավոր զինծառայող, ինչպես նաև զինտեխնիկայի զգալի կորուստներ, մասնավորապես՝ 4 БТР զրահափոխադրիչ, 1 Sandcat զրահամեքենա, 5 ավտոմոբիլային միջոց (Камаз, Урал, УАЗ)։ Շուրջ 6 ժամ տևած մարտական գործողությունները դադարեցվել էին ռուսական կողմի միջնորդությամբ։

Արփի Հակոբյան