ՄՏՍ-ը ԱՄՆ-ի դիմումով ստուգում է Հայաստանում իր մասնաճյուղի գործունեությունը

Մոնիթորինգի համակարգը, որը «ՄՏՍ» ընկերությունն ամերիկյան իշխանությունների հետ համագործակցությամբ ներդրել է Ուզբեկստանում ընկերության հակակոռուպցիոն կարգավորումների շրջանակում, ուշադրության է դարձրել հետխորհդային մեկ այլ երկրում՝ Հայաստանում գործունեության վրա։ Այս մասին գրում է «Ինտերֆաքս»-ը։

Օպերատորի տարածած հաղորդագրության մեջ նշվում է, որ համակարգը Հայաստանում ՄՏՍ-ի դուստր ձեռնարկությունում՝ «ՎիվաՍել ՄՏՍ»-ում մի շարք օպերացիաներ է բացահայտել, դրանց մասին տեղեկատվությունը ուղարկել ԱՄՆ Արդարադատության նախարարություն ու Արժեթղթերի և բորսաների հանձնաժողով։ Վերջիններն իրենց հերթին լրացուցիչ տեղեկատվություն են խնդրել այդ գործարքների մասով։ ՄՏՍ-ում նշել են, որ դեռ չեն կարող կանխատեսել ստուգման արդյունքների ժամկետներն ու դրա արդյունքը։

«Մենք, որպես հանրային ընկերություն, միշտ բացահայտում ենք ցանկացած տեղեկատվություն կարգավորիչների դիմումների մասին։ Ներկա փուլում ավելի մանրամասն ստուգման ընթացքն ու բովանդակությունը մեկնաբանելը վաղաժամ է։ Մենք շարունակում ենք զարգացնել ՄՏՍ-ում «compliance» համակարգը, այդ թվում՝ Հայաստանում մեր մասնաճյուղում»,- «Ինտերֆաքս»-ին հայտնել են ընկերության մամուլի ծառայությունից։

Նշենք, որ 2019 թվականի սեպտեմբերին ՄՏՍ-ը SEC-ի և Արդարադատության նախարարության հետ կնքված բարեկամական համաձայնագրի շրջանակում ներդրել է մոնիթորինգի անկախ համակարգ, որը նախատեսում է ընկերության ներսում հակակոռուպցիոն քաղաքականության, կանոնակարգերի և ընթացակարգերի բարելավում։ Համաձայնագիրը ստորագրվել է 2019 թվականի մարտին Ուզբեկստանում ընկերության գործունեության հակակոռուպցիոն հետաքննության շրջանակում։ Պայմանագիրը նախատեսում էր, որ ընկերությունը, ընդհանուր առմամբ, 850 մլն դոլար է վճարելու։

Էմմա Չոբանյան