16.12.2025 | 16:57
Վարչապետի գլխավորությամբ քննարկվել է հանրային կառավարման բարեփոխումների ընթացքը
Այլ որակի մարդիկ են պետք․ Մոսկվայի քաղաքապետը կրճատում է աշխատանքային ներգաղթյալների թիվը
Քաղաքականություն
17.11.2021 | 21:32
Այսօր Մոսկվայի քաղաքապետ Սերգեյ Սոբյանինն այցելել է Բաումանսկայա փողոցում կառուցված շենքերից մեկը, որը վերանորոգվել է Մոսկվայի քաղաքապետարանի վերակառուցման լայնածավալ ծրագրի շրջանակում, գրում է BBC-ի ռուսական ծառայությունը։
«Այլ որակի մարդիկ են պետք, այլ աշխատավարձով, ավելի քիչ ներգաղթյալներ, որոնք այսօրվա դրությամբ բավական շատ են։ Ավելի շատ ռուսների ներգրավեք հարևան շրջաններից, աշխատավարձ բարձրացրեք, աշխատանքային պայմաններ ստեղծեք», դիմելով վերանորոգող ընկերության գլխավոր տնօրեն Ալեքսեյ Դոբաշինին՝ հայտարարել է Սոբյանինը։
Նա նաև առաջարկել է բարձրացնել աշխատանքի արտադրողականությունը, մեքենայացումը և «շինարարության արդյունաբերականացումը»։
Դոբաշինը բացատրել է, որ իր ընկերությունում 1 տարվա ընթացքում 15%-ով քիչ են եղել ներգաղթյալները, իսկ լավ որակավորում ունեցող շինարարները վաստակում են մոտ 120-150 հազար ռուբլի։
«Այդ աշխատավարձը պետք է լինի մոսկվացիների, ոչ թե ներգաղթյալների համար»,- արձագանքել է Սոբյանինը։
Երկար տարիներ աշխատանքային միգրանտները կազմում են Մոսկվայում շինարարական աշխատանքներ իրականացնողների հիմնական մասը: Համաճարակի սկզբից նրանց թիվը զգալիորեն նվազել է։
Այս տարվա օգոստոսին Մոսկվայի քաղաքապետարանի շինարարության վարչության պետ Ռաֆիկ Զագրուտդինովը հայտարարել էր, որ բյուջեի միջոցներով տներ կառուցող ընկերությունները (այդ թվում՝ վերանորոգման շրջանակում) մոտ 15-20 հազար աշխատող չունեն՝ շինարարության բարձր տեմպերը պահպանելու համար։
Սեպտեմբերին քաղաքաշինության քաղաքականության գծով փոխքաղաքապետ Անդրեյ Բոչկայովը հայտնել էր, որ տեղի աշխատողներն արդեն մասամբ փոխարինել են ներգաղթյալներին Մոսկվայում ճանապարհաշինության ոլորտում։ Նրա խոսքով՝ համաճարակի պատճառով սահմանների փակումը հանգեցրել է նախկին ԽՍՀՄ երկրներից աշխատողների լուրջ արտահոսքի։
Տաթև Ֆռանգյան
