18.01.2026 | 11:31
Վթարային ջրանջատում Վայոց Ձորի մարզում
Միջադեպը պետք է դիտարկել ադրբեջանական կողմի հանցանքներն անպատիժ թողնելու համատեքստում․ ԱՀ ՄԻՊ
13.11.2021 | 19:56
ԱՀ ՄԻՊ Գեղամ Ստեփանյանը հայտնել է, որ քիչ առաջ ԱՀ քննչական կոմիտեում հանդիպել է քաղաքացուն, ծանոթացել դեպքի հանգամանքներին։ Քաղաքացին կապ է հաստատել հարազատների հետ։
«Արձանագրված միջադեպի հանգամանքներն ուսումնասիրելու գործողություններն իրականացվելու են Արցախի Հանրապետության իրավապահ մարմինների կողմից՝ ապահովելով քաղաքացու բոլոր իրավունքներն ու օրինական շահերը։ Այս հարցում ՄԻՊ գրասենյակը իր իրավասությունների շրջանակներում իրականացնելու է բոլոր անհրաժեշտ գործողությունները։
Այսօրվա միջադեպը պետք է դիտարկել 2020 թվականի նոյեմբերի 9-ի եռակողմ հայտարարությունից հետո ստեղծված իրավիճակի՝ հրադադարի հաստատումից ի վեր մեկ տարվա ընթացքում Արցախի ժողովրդի նկատմամբ ադրբեջանական կողմի հանցանքերն անպատիժ թողնելու, Արցախի ժողովրդի իրավունքների պարբերաբար ու նպատակային խախտումների և ժողովրդին հոգեբանական ահաբեկման ենթարկելու ամբողջական համատեքստում»,- գրել է Ստեփանյանը։
Ինչպես արդեն տեղեկացրել ենք, այսօր՝ վաղ առավոտյան, Շուշի քաղաքի անցակետի մոտ՝ ադրբեջանցի զինծառայողների սադրիչ գործողություններին ի պատասխան, ԱՀ քաղաքացին պայթուցիկ սարք է նետել անցակետի հատվածում։
Լրատվամիջոցները գրում էին, որ նշված անձը նոյեմբերի 8-ին «Շուշիի տակ» կոչվող տեղանքում Ադրբեջանի Հանրապետության զինված ուժերի զինծառայողի կողմից սպանված «Ջրմուղ-կոյուղի» ՓԲ ընկերության աշխատակից, Ստեփանակերտ քաղաքի՝ 1998 թվականին ծնված բնակիչ Մարտիկ Երեմյանի եղբայրն է։ Factor.am-ը տեղեկություններ ունի, որ նռնակ նետած ԱՀ քաղաքացին ոչ թե Մարտիկ Երեմյանի եղբայրն է, այլ նրա հոր ընկերը։
Ռուսական խաղաղապահ զորակազմի մոտ գտնվող Արցախի Հանրապետության քաղաքացին փոխանցվել է Արցախի իրավապահներին։
Նշենք նաև, որ միջադեպի հետևանքով փակվել էր Ստեփանակերտ-Բերձոր ճանապարհը, իսկ ավելի ուշ՝ բացվել։ Արցախի ԱԱԾ-ն հայտնել է, որ միջադեպի հետևանքով ԱՀ քաղաքացիների շրջանում վիրավորներ և տուժածներ չկան։
