Միխայիլ Սաակաշվիլին որոշել է դադարեցնել հացադուլը

Վրաստանի նախկին նախագահ Միխայիլ Սաակաշվիլին հայտարարել է, որ որոշել է հաշվի առնել Ստրասբուրգի Մարդու իրավունքների դատարանի առաջարկը և դադարեցնել հացադուլը, բայց միայն այն դեպքում, եթե իրեն Գլդանիի բանտի հիվանդանոցից տեղափոխեն համապատասխան հաստատություն՝ վերականգնվելու համար։ Վրացի քաղաքական գործչի ուղերձն ընթերցել է նրա փաստաբան Նիկա Գվարամիան, գրում է «ՌԻԱ Նովոստին»։

«Ես որոշում եմ կայացրել հաշվի առնել Ստրասբուրգի դատարանի և արևմտյան գործընկերների կոչերն ու դադարեցնել հացադուլը։ Հենց որ այս հիմնարկից ինձ տեղափոխեն համապատասխան հաստատություն, ես անհապաղ կդադարեցնեմ հացադուլը»,- Սաակաշվիլիի ուղերձը լրագրողների համար ընթերցել է փաստաբանը։

Նրա խոսքով՝ Սաակաշվիլին պահանջում է կլինիկայում ապահովել իր անվտանգությունն ու բարձրակարգ բուժում հետվերականգնողական շրջանում։

Հիշեցնենք՝ Միխայիլ Սաակաշվիլին ձերբակալվել էր Վրաստանում հոկտեմբերի 1-ին: Նա ձերբակալությունից հետո հացադուլ է սկսել, քանի որ համաձայն չէ առաջադրված մեղադրանքների հետ և իրեն համարում է քաղբանտարկյալ: Վրաստանում Սաակաշվիլին ներգրավված է մի քանի քրեական գործերում: Նախկին նախագահը հեռակա դատապարտվել է բանկիր Սանդրո Գիրգվլիանիի սպանության և պատգամավոր Վալերի Գելաշվիլիի ծեծի համար: Առաջին դեպքում նա դատապարտվել է երեք տարվա ազատազրկման, երկրորդում՝ վեցի: Բացի այդ, Սաակաշվիլին ներգրավված է 2007 թվականի նոյեմբերի 7-ին ընդդիմության հանրահավաքը ցրելու, «Իմեդի» հեռուստաընկերության ջարդի և պետական բյուջեից միջոցների յուրացման գործերում: Այս գործերը դեռ քննվում են դատարանում։

Տաթև Ֆռանգյան