08.06.2026 | 21:59
Վստահ եմ, որ Հայաստանի և Իրանի հարաբերությունները նոր շրջանում էլ կշարունակեն ամրապնդվել. Փեզեշքիան
Հինդուների համար սուրբ գետը պատվել է թունավոր փրփուրով, սակայն հավատացյալները շարունակում են լողանալ այնտեղ․ ԼՈՒՍԱՆԿԱՐՆԵՐ
Քաղաքականություն
11.11.2021 | 23:05
Չորեքշաբթի Հնդկաստանի մայրաքաղաքի մոտակայքով հոսող և հինդուների համար սուրբ համարվող գետը թունավոր փրփուրի շերտով է պատվել, մինչդեռ հինդուները հավաքվել են դրա ափերին՝ տոնելու կրոնական տոնը, իսկ որոշ նվիրյալներ անգամ լողացել են գետի աղտոտված ջրերում, գրում է CNN-ը:
Սպիտակ փրփուրը, որը կոյուղաջրերի և արդյունաբերական թափոնների խառնուրդ է, ձևավորվել է վերջին շաբաթվա ընթացքում Յամունա գետի վրա, որը սուրբ Գանգես գետի վտակն է և սկիզբ է առնում Հիմալայներից 855 մղոն հարավից ու հոսում մի քանի նահանգներով:
Թունավոր փրփուրը պարունակում է մեծ քանակությամբ ամոնիակ և ֆոսֆատներ, որոնք, ըստ մասնագետների, կարող են հանգեցնել շնչառական և մաշկային խնդիրների: Փրփուրի հայտնվելը համընկել է Չհաթ Պուջայի տոնի հետ, որը նվիրված է արևի աստված Սուրյային: Այս շաբաթվա սկզբին որոշ հինդուներ լողացել են թունավոր փրփուրների մեջ և աղոթել իրենց աստծուն:
Հավատացյալներից Գունջան Դևին պատմել է, որ այլ ելք չունի, քան լողանալ աղտոտված ջրերում:
«Ջուրը չափազանց կեղտոտ է, բայց մենք շատ տարբերակներ չունենք։ Գետի ջրում լոգանք ընդունելը ծես է, ուստի մենք եկել ենք այստեղ լողանալու»,- ասել է նա Reuters-ին:
Press Trust of India-ի տվյալներով՝ կառավարությունը 15 նավ է գործի դրել՝ փրփուրը հեռացնելու համար, սակայն փորձագետները մտավախություն ունեն, որ այն արդեն զգալի վնաս է հասցրել։
