ՀՀ քաղաքացիների նկատմամբ հսկողություն չսահմանելու գինը միջանցքն էր, ինչն անընդունելի է. Փաշինյան․ ՏԵՍԱՆՅՈՒԹ

ՀՀ կառավարության նիստի ընթացքում վարչապետ Նիկոլ Փաշինյանը խոսել է այն մասին, թե ինչպես պետք է վերաբերվել Ադրբեջանի երեկվա որոշմանը:

«Շահարկումներից խուսափելու համար պիտի հիշեցնեմ և ձեր ուշադրությունը հրավիրեմ այն փաստի վրա, որ ադրբեջանական անցակետը չի գտնվում ՀՀ տարածքում: Խոսքն Էյվազլիի հատվածի մասին է: Հիմա կարող է այլ հարց ծագել. իսկ հնարավոր չէ՞ր բանակցել, որ այդ ճանապարհին ՀՀ քաղաքացիների և բեռների նկատմամբ որևէ սահմանային հսկողություն չիրականացվեր: Հնարավոր էր, բայց դրա գինը լինելու էր «միջանցքային տրամաբանությունը», ինչն անընդունելի է մեզ համար:

Տարածաշրջանային կոմունիկացիաների վերաբերյալ ՀՀ դիրքորոշումը մշտապես եղել է այն, որ դրանք պետք է վերաբացվեն՝ առանց որևէ էքստերիտորիալության համատեքստի և համապատասխան մաքսային, անձնագրային հսկողության: Այսինքն՝ երբևէ չենք քննարկել ու չենք քննարկելու որևէ միջանցքային տրամաբանություն, ինչպես նախկինում մի քանի անգամ հայտարարել եմ»,- ասաց Փաշինյանը:

Փաշինյանը նշեց, որ սա ֆիքսված է փոխվարչապետների եռակողմ՝ Ռուսաստան, Հայաստան, Ադրբեջան ֆորմատում:

«Կարևոր է նաև նշել, որ վերջին շաբաթներին այս տրամաբանությունը և պայմանավորվածությունը հրապարակային կերպով հաստատել է նաև ՌԴ-ն: Եվ այս համատեքստում է թերևս Ադրբեջանը կայացրել երեկվա որոշումը»,- ասաց Փաշինյանը:

Նիկոլ Փաշինյանն ընդգծեց, որ Հայաստանը նույնպես, ըստ անհրաժեշտության, անցման տեղերում կտեղադրի մաքսային, անձնագրային հսկողության կետեր:

Մանրամասները՝ տեսանյութում: