Հասարակություն
09.11.2021 | 15:28Շիրակի նորանշանակ մարզպետ Նազելի Բաղդասարյանն այսօր լրագրողների հետ զրույցում տեղեկացրեց, որ այս պահի դրությամբ մարզի 62 գերեվարվածների կեսը վերադարձել է, մյուսների վերադարձի համար էլ ակտիվ, շարունակական գործընթացներ են տարվում։
Ըստ նրա, պատգամավորի կարգավիճակում ավելի շատ լիազորություններ ուներ այս հարցով զբաղվելու, քանի որ օգտագործում էր խորհրդարանական դիվանագիտությունը։
«ԵԽԽՎ մեր վերջին բանաձևում պնդել եմ հատուկ գերիների վերադարձի հետ կապված որոշակի դրույթներ, մասնավորապես առանձնացնելով Խծաբերդի գերիներին, իրենց կարգավիճակային հարցը։
Գիտեք, որ Բաքվի դատարանում ապօրինի քրեական գործեր են հարուցվել, որոնք որևէ մի իրավական հիմք չունեն։ Եվ այդ ամենը միջազգային մի քանի փաստաթղթերում արտացոլված է ։ Գիտեք նաև, որ զուգահեռ ՄԱԿ-ի քրեական դատարանում գործընթաց ունենք և այդտեղ որոշակիորեն փոքր, համեստ ներդրումներով փորձում ենք այս հարցին լուծում տալ։
Գերիների վերադարձի հարցով պետք է ասեմ, որ գործընթացը շարունակական է։ Մենք մի կարևոր ձեռքբերում ունեցանք, երբ դատավարության ընթացքում գերիները որոշակի քրեական հոդվածներով դատապարտվել էին և հարազատների մոտ մտածմունք կար, որ իրենք այլևս չեն վերադառնա։ Վերջին հինգ վերադարձածները, որոնք Շիրակի մարզից էին , ապացուցեին, որ այդ դատավարությունն իրականում բեմադրություն է և դատապարտված լինելով անգամ՝ իրենք վերադարձել են հայրենիք», -ասաց Նազելի Բաղդասարյանը։
Արմիկ Մովսիսյան
