10.09.2026 | 23:04
ԿԳՄՍ նախարարը մանկավարժների հետ ոլորտային հարցեր է քննարկել
Իմ տունը աչքիս առաջ է պայթել․ Շուշիից տեղահանված բնակիչ․ ՏԵՍԱՆՅՈՒԹ
09.11.2021 | 12:00
Արցախից տեղահանված բնակիչները բողոքի ակցիա են իրականացնում Հանրապետության հրապարակում։ Նրանք պահանջում են փախստականի կարգավիճակ տալ իրենց և անդրադառալ սոցիալական խնդիրների լուծման հարցին։
Նոյեմբերի 9-ի եռակողմ հայտարարությունն ընդունելի չէ ժողովրդի համար։ Լրագրողների հետ զրույցում նշեց շուշեցի Աշոտ Հարությունյանը։
Աշոտ Հարությունյանը նշում է, որ եթե անգամ առաջնորդվեն նոյեմբերի 9-ի հայտարարության կետերով, ապա այնտեղ նշված է փախստականների վերադարձ։
«Եթե մեր հայրենի կառավարությունը մեզ չի ընդունում որպես փախստական, ապա մեր վերադարձն ինչպե՞ս է լինելու։ Մեզ ոչ մի կարագավիճակ չեն տվել, ինչը գալիս է դեռևս 1988-ի սխալ քաղաքականությունից։ Ադրբեջանն իր 350 հազար փախստականներին աշխարհին ներկայացրեց որպես 1 մլն փախստական, որոնք Ադրբեջանի տարածքից դուրս չէին եկել, բայց իրենք աշխարհին համոզեցին՝ փախստական են»,-ասաց Աշոտ Հարությունյանը։
Շուշեցին նկատեց՝ պարտությունից հետո ինչպե՞ս կարող են վստահել այս մարդկանց, որ նորից իրենք տանեն այս «նավը»։ Աշոտ Հարությունյանի կարծիքով՝ այս կառավարությունը 180 աստիճանով պետք է փոխվի և սկսի ներկայացնել ազգային շահերը։
«Պետք է հետևել թշնամի երկրի գործողություններին, որոնք արդյունքի են հասել։ Նրանք հիմնադրել են փախստականների ավաններ, միջազգային դիտորդներ են բերել։ Մենք էլ պետք է նույնը անենք։ Երբ ասում եմ Երևանի շուրջը փախստականների ավանի հիմնադրում, հենց այնպես չեմ ասում։ Դա մտածված, ծրագրային պետք է իրականացվի։ Եթե միջազգային հանրությանը չկարողանաս համոզել, որ ունես փախստականներ, ինչպե՞ս ես քո հարցերը լուծելու։ Ցանկացած միջազգային կառույցի, որ մոտենում և դիմում ենք հանձնում, ասում՝ ձեր կառավարությունը ձեզ ճանաչո՞ւմ է որպես փախստական։ Սա է կարևորը»,-նշեց Հարությունյանը։
Հարցին, թե ինչ է թողել Շուշիում, Հարությունյանը պատասխանեց. «Ամեն ինչ: Իմ տունը իմ աչքի առաջ է պայթել հոկտեմբերի 29-ին: Դա պատմելու բան չէ: Ես Շուշիում մնացել եմ մինչև նոյեմբերի 6-ը, երբ որ խաղաղ բնակչությունն արդեն սկսեց լքել քաղաքը»:
Մանրամասները՝ տեսանյութում:
