Եթե խաղաղության փոխարեն պատերազմից խոսենք, Ադրբեջանը չի՞ կրակելու. Ալեն Սիմոնյան․ ՏԵՍԱՆՅՈՒԹ

ԱԺ նախագահ Ալեն Սիմոնյանը ԱԺ-ում շուշեցի հայազգի ճարտարապետների գործերի ցուցադրության ժամանակ լրագրողների հետ զրույցում անդրադառնալով հարցին, թե ինչպես է գնահատում Բաքվի քայլերը, մասնավորապես երեկվա սադրանքն Արցախում, նշեց. «Ադրբեջանի գործողությունները սադրիչ բնույթ են կրում: Եվ դրանք զուգորդվում են նաև հակառակ հայտարարություններով։ Մենք պետք է նայենք, թե մեր երկրի շահը որն է: Մեզ պետք է այնպիսի իրավիճակ, որ մենք կարողանանք Մինսկի խմբի համանախագահների հետ շարունակել Արցախի հարցով քննարկումները, որոնք ընդհատվել են:

Իսկ Ադրբեջանի վարքագիծը րոպեական ոգևորվածությամբ է պայմանավորված՝ իրենց համար անսպասելի իրավիճակից ելնելով»:

Անդրադառնալով դիտարկմանը, որ Հայաստանը խոսում է խաղաղությունից, խաղաղության դարաշրջան բացելուց, մինչդեռ Ադրբեջանը կրակում է քաղաքացիական անձանց ուղղությամբ և հարցին, թե արդյոք հայկական կողմի պատասխանն ադեկվատ է, Սիմոնյանը նշեց. «Եթե խաղաղության փոխարեն պատերազմից խոսենք, Ադրբեջանը չի՞ կրակելու: Այո՛, մեր պատասխանն ադեկվատ է: Մենք չպետք է պատերազմ հրահրենք և պատերազմ սկսենք, մենք երբևիցե դա չենք արել»:

Դիտարկմանը, որ հայկական կողմը դատապարտող որևէ հայտարարությամբ հանդես չի գալիս ԱԺ նախագահն արձագանքեց. «Ես քիչ առաջ ասացի, որ Ադրբեջանի արարքը դատապարտելի է և պայմանավորված է հաջողության պոռթկումներով: Ես կարող եմ տեսախցիկների առաջ վատ ու ամպագորգոռ հայտարարություններ անել, բայց դրանից այդ կրակոցներն ավելի շուտ շատանալու են, քան քչանալու են։ Մենք պետք է երկարատև խաղաղության ճանապարհով գնանք, որպեսզի կարողանանք մեր երկիրը կառուցել»:

Մանրամասները՝ տեսանյութում: